Ուկրաինայի Ազգային բանկը սահմանափակել է պատերազմի ժամանակ կանխիկ գումարի հանումը

Ուկրաինայի Ազգային բանկը ֆիքսել է դոլարի փոխարժեքը 29,25 գրիվնայի մակարդակում եւ սահմանափակել դրամի կանխիկացումը՝ սահմանելով այն օրական մինչեւ 100 հազար գրիվնա: Այս մասին հայտնել է Ուկրաինայի Ազգային բանկի ղեկավար, Կիրիլ Շեվչենկոն, հաղորդում է «Ուկրաինսկայա պրավդան»։

Ազգային բանկը փետրվարի 24-ին ֆիքսել է փոխարժեքը պաշտոնական փոխարժեքի մակարդակում, այսինքն 29,25 գրիվնա մեկ դոլարի համար։

Բացի այդ կարգավորող մարմինը դադարեցրել է արժութային շուկայի աշխատանքը, բացի արտարժույթի վաճառքի գործառնություններից։

Կանխիկացումը սահմանափակվում է օրական մինչեւ 100 000 գրիվնա՝ առանց հաշվի առնելու աշխատավարձի եւ սոցիալական վճարումները: Դա չի վերաբերում կառավարության զորահավաքային պլանների կատարումն ապահովող ձեռնարկություններին եւ հիմնարկներին։

Արգելվում է օտարերկրյա արժույթով հաճախորդների հաշիվներից կանխիկ դրամական միջոցների տրամադրումը, բացի կառավարության խնդիրների կատարումն ապահովող հիմնարկներից։

Մտցվում է անդրսահմանային արժութային վճարումների իրականացման մորատորիում՝ նույն բացառություններով։ Ուկրաինայի Ազգային բանկը նաեւ դադարեցնում է ռուսաստանցիների հաշիվներով կատարվող գործարքները։ Էլեկտրոնային փող թողարկող բանկերը դադարեցնում են դրանց թողարկումն ու շրջանառությունը։

Բանկերն ապահովում են բաժանմունքների անխափան աշխատանքը, եթե չկան մարդկանց կյանքի եւ առողջության սպառնալիքներ։ Անխափան ռեժիմով ապահովվում է չհրկիզվող պահարանների հասանելիությունը։

Անկանխիկ հաշվարկները չեն սահմանափակվում, բանկոմատներն ապահովվում են կանխիկ դրամով՝ առանց սահմանափակումների։ Ուկրաինայի Ազգային բանկը իրականացնում է բանկերի բլանկային վերաֆինանսավորում՝ աջակցելու համար առանց սահմանափակումների իրացվելիությանը՝ 1 տարվա գումարով՝ եւս մեկ տարի երկարաձգելու հնարավորությամբ։

Կառավարության վճարումները կատարվում են առանց սահմանափակումների։