Օտտավայում կորոնավիրուսի դեմ բողոքի ցույցերի երկու առաջնորդներ են ձերբակալվել

Օտտավայի ոստիկանությունը կորոնավիրուսային սահմանափակումների դեմ բողոքի ցույցերի վերջին հենակետը ցրելու ժամանակ ցույցերի երկու առաջնորդների է ձերբակալել, հայտնում է BBC-ն։

Թամարա Լիչը ձերբակալվել է հինգշաբթի երեկոյան՝ Քրիս Բարբերի ձերբակալությունից հետո: Նշվում է, որ երկուսն էլ քրեական պատասխանատվության կենթարկվեն, հայտնում է CBC News-ը:

Իշխանություններն արդեն ցրել են սահմանային անցակետերում ընթացող բողոքի մյուս ակցիաները։ Դա տեղի ունեցավ մի քանի օր անց այն բանից հետո, երբ Կանադան առաջին անգամ կիրառեց արտակարգ իրավիճակների մասին օրենքը: Արտակարգ իրավիճակների մասին օրենքը, ի թիվս այլ միջոցների, արգելում է հասարակական հավաքույթները որոշ թաղամասերում:

Օտտավայում ցուցարարները, որոնցից շատերը մոտ 400 ծանր բեռնատարներ եւ այլ ավտոմեքենաներ են կայանել խորհրդարանի շրջակայքի քաղաքային փողոցներում, նախազգուշացվել են, որ նրանց ձերբակալություն, ինչպես նաեւ բեռնատարների առգրավում, ապահովագրության կասեցում եւ բանկային հաշիվների սառեցում է սպառնում:

Ոստիկանությունը հայնում է, որ իրենք նաեւ աշխատում են երեխաների պաշտպանության գործակալությունների հետ՝ ցուցարար երեխաներին ցույցերի վայրից հեռացնելու համար:

Լիչն ավելի վաղ կանադական մամուլին ասել էր, որ իր անձնական բանկային հաշիվն արդեն սառեցված է եւ ինքը համակերպվել է մտքի հետ, որ բանտ է նստելու:

Փոխվարչապետ Քրիստյա Ֆրիլանդը հաստատել է, որ կառավարությունը սկսել է սառեցնել բեռնատարների վարորդների բանկային հաշիվները։
Օտտավայի ոստիկանությունը մոտ 100 ոստիկանական հսկիչ անցակետ է տեղադրել բողոքի ցույցի հիմնական վայրի եւ քաղաքի կենտրոնում գտնվող մեծ գործարար եւ բնակելի թաղամասի շուրջ: