Միլոշ Զեման. Ոչ մի պատերազմ չի լինի, քանի որ ռուսաստանցիները խելագար չեն

Պնդումները, թե փետրվարի 16-ին Ռուսաստանը կներխուժի Ուկրաինա, ամերիկյան հատուկ ծառայությունների հերթական կոնֆուզն էին։ Այսպիսի կարծիք է հայտնել Չեխիայի նախագահ Միլոշ Զեմանը Mladá fronta DNES թերթի հարցազրույցում։ Նա այդ պնդումները համեմատել է Իրաքում եւ Աֆղանստանում սպառնալիքների մասին նախկինում ամերիկյան կողմի տարածած այն հայտարարությունների հետ, որոնք նույնպես չհաստատվեցին, տեղեկացրել է ՏԱՍՍ-ը։

«Իմ կարծիքը [Ուկրաինայի շուրջ իրավիճակի վերաբերյալ այսպիսին է], որ ոչ մի պատերազմ չի լինի, քանի որ ռուսաստանցիները խելագար չեն, որպեսզի մտնեն մի գործողության մեջ, որը նրանց ավելի շատ վնաս, քան օգուտ կբերի,- կարծում է Զեմանը։- Եթե խոսքը ամերիկյան հատուկ ծառայությունների մասին է, ապա դա (տեղեկությունը փետրվարի 16-ին ռազմական գործողություններ սկսելու մասին) նրանց երրորդ կոնֆուզն է։ Առաջինը պատերազմն էր Իրաքում, որտեղ զանգվածային ոչնչացման ոչ մի զենք չհայտնաբերվեց։ Երկրորդը Աֆղանստանն էր, երբ [ԱՄՆ հատուկ ծառայությունները] պնդում էին, թե «Թալիբանը» երբեք չի գրավի Քաբուլը։ Եվ հիմա էլ երրորդն է»։

Զեմանը տեղեկացրել է, որ փետրվարի 16-ից 5 օր առաջ գաղտնի տեղեկություն է ստացել Ուկրաինայի դեմ իբր պատրաստվող ռուսական ներխուժման մասին։ «Դա տեղեկություն էր ԿՀՎ-ից։ Ես ԿՀՎ-ին չեմ հարցնում, թե որոնք են նրա տեղեկատվության աղբյուրները։ Միայն [վերոնշյալ երեք կոնֆուզների] հիման վրա կասկած եմ հայտնում այդ աղբյուրների որակի մասին»,- ասել է Չեխիայի նախագահը։

Միեւնույն ժամանակ, նա չի բացառել Դոնբասում լարվածության թեժացման հնարավորությունը։ «Չեմ կարող բացառել մի ինչ-որ տեղային [ռազմական] հակամարտություն Դոնեցկի կամ Լուգանսկի հանրապետությունների հետ [Ուկրաինայի] սահմանին, բայց դա միանգամայն այլ բան է, ոչ թե ռուսական ագրեսիա Ուկրաինայում»,- ասել է նախագահը։

Զեմանը հիշեցրել է, որ ՌԴ-ն սկսել է հեռացնել զինվորականներին Ուկրաինայի հետ սահմանից՝ սեփական տարածքում զորավարժությունների ավարտից հետո։ Այս փաստը հերքում է արեւմտյան քաղաքական գործիչների պնդումները ռուս-ուկրաինական հակամարտության սպառնալիքի մասին։