Շվեդիայում հայտարարել են, որ չեն անդամակցելու ՆԱՏՕ-ին

Շվեդիայի կառավարությունը մտադիր չէ ՆԱՏՕ-ին անդամակցելու հայտ ներկայացնել։ Այս մասին ասվում է 2022 թվականի արտաքին քաղաքականության հռչակագրում, որը չորեքշաբթի հրապարակվել է երկրի կառավարության կողմից եւ ներկայացվել խորհրդարանում Շվեդիայի արտաքին գործերի նախարար Անն Լինդեի կողմից:

«Կառավարությունը մտադիր չէ ՆԱՏՕ-ին անդամակցելու հայտ ներկայացնել։ Շվեդիայի անվտանգության քաղաքականությունն անփոփոխ է մնում: Ռազմական դաշինքներից ազատությունը լավ է ծառայում մեզ եւ նպաստում է կայունությանն ու անվտանգությանը Հյուսիսային Եվրոպայում», - ասել է Լինդեն:

Նրա խոսքով՝ նման ընթացքն ակտիվ, լայն եւ պատասխանատու անվտանգության եւ արտաքին քաղաքականություն է ենթադրում՝ պաշտպանական, այդ թվում՝ անդրատլանտյան համագործակցության խորացման հետ միասին:

Հռչակագրում, այսպես կոչված, ՆԱՏՕ-ի տարբերակը չի նշվում։ 2020 թվականի դեկտեմբերին խորհրդարանական մեծամասնությունը (Չափավոր կոալիցիոն կուսակցություն, «Շվեդ դեմոկրատներ», Քրիստոնեա-դեմոկրատներ, Կենտրոնական կուսակցություն եւ լիբերալներ) քվեարկեց, որ Շվեդիան, ինչպես Ֆինլանդիան, հայտարարի այս տարբերակի գոյության մասին։ Դա նշանակում է, որ Շվեդիան պահպանում է դաշինքին անդամակցության հայտ ներկայացնելու հնարավորությունը։

Հռչակագրում գնահատվում է նաեւ անվտանգության քաղաքականությունը, այն ներառում է «Շվեդիայի վրա զինված հարձակումը չի կարելի բացառել» ձեւակերպումը։ Կառավարությունն այս գնահատականը տվել է իր 2020 թվականի ընդհանուր պաշտպանությանօրինագծում, որը հիմնված էր պաշտպանության կոմիտեի վերլուծության վրա: