Պենտագոնը հույս ունի ուկրաինացիներին ռազմական օգնություն հասցնել ցամաքով

Պենտագոնը հույս ունի ռազմական օգնությունն ուկրաինացիներին հասցնել ցամաքով, որպեսզի օգնի Կիեւին երկրի ներսում դիմակայության կազմակերպման հարցում, եթե Ռուսաստանը ներխուժի Ուկրաինա, Ներկայացուցիչների պալատի անդամներին ասել է ազգային անվտանգության գծով խորհրդական Ջեյք Սալիվանը մասնավոր զրույցի ժամանակ, փոխանցում է The Hill-ը։

Սալիվանն ասել է, որ պաշտպանության նախարար Լլոյդ Օսթինը ցանկանում է քննարկել ուկրաինացիներին մահաբեր զենք հասցնելու ցամաքային երթուղիները, եթե Ռուսաստանն սկսի գրոհը։

Օսթինը, ըստ երեւույթին, թեման կքննարկի ՆԱՏՕ ղեկավարների հետ, երբ այցելի Բրյուսել եւ Արեւելյան Եվրոպա։ Նա պատրաստվում է երեքշաբթի դուրս գալ Վաշինգտոնից՝ հանդիպելու Բելգիայի, Լեհաստանի եւ Լիտվայի բարձրաստիճան զինվորականների եւ կառավարությունների ղեկավարների հետ։ Նա կմասնակցի նաեւ դաշինքի նախարարների համաժողովին, տեղեկացրել է Պենտագոնի մամուլի քարտուղար Ջոն Քիրբին։

Բայդենի վարչակազմը անցած տարի հավանություն էր տվել Կիեւին մոտ 650 մլն դոլարի ռազմատեխնիկա մատակարարելուն։ Բոլորովին վերջերս վարչակազմը հավանություն է տվել 200 մլն դոլարի փաթեթին Ուկրաինայի համար, որը ներառում էր «Javelin հակատանկային հրթիռներ, հակատանկային այլ համակարգեր, նռնականետեր, զինամթերք եւ ոչ մահաբեր այլ սարքավորումներ»։

ԱՄՆ-ը նաեւ թույլ է տվել Բալթյան երկրներին, ներառյալ Լատվիան, Լիտվան եւ Էստոնիան, Կիեւին մատակարարել ամերիկյան արտադրության հակատանկային եւ զենիթային հրթիռներ։

Բացի այդ, Պենտագոնը տեղակայել կամ Լեհաստան, Գերմանիա եւ Ռումինիա է տեղափոխել ԱՄՆ 6000 զինծառայողի։