TALK TIME. ՀՀ իշխանությունները ցանկանում են լեգիտիմացնել իրենց գործողությունները 44-օրյա պատերազմի ժամանակ

Խորհրդարանական ընդդիմության մասնակցությունը 44-օրյա պատերազմի հանգամանքներն ուսումնասիրող ԱԺ քննիչ հանձնաժողովի աշխատանքներին չի երաշխավորում ճշմարտության բացահայտումը։ Այս մասին NEWS.am-ի թղթակցի հետ զրույցում TALK TIME հաղորդման ժամանակ ասել է ընդդիմադիր «Հայաստան» խմբակցության պատգամավոր Էլինար Վարդանյանը։

Նրա խոսքով՝ ստացվում է մի իրավիճակ, երբ իշխող խմբակցությունը, ում ձեւավորած իշխանությունը հենց պատասխանատու է 44-օրյա պատերազմի համար, փորձում է քննել հենց 44-օրյա պատերազմի հանգամանքները։

«Սա բերելու է մի ֆարսի, որը, ըստ էության, լեգիտիմացնելու է, օրինականացնելու է այն ողջ գործողությունները, որ իշխանություններն արել են 44-օրյա պատերազմի ժամանակ։ Մենք գիտենք, որ Փաշինյանը եւ հենց իշխանությունը փնտրում են մեղավորներ։ Այսինքն նրանց համար 44-օրյա պատերազմում մեղավոր են բոլորը, բացի իրենցից։ Հիմա ո՞նց եք պատկերացնում, այս հանձնաժողովը արդյո՞ք բացահայտելու է իրականությունը, ինչ եղել է իրականում», - ասել է նա։

Պատգամավորը նաեւ նշել է, որ նորաստեղծ հանձնաժողովը պետք է քննարկի և քննի բազմաթիվ հարցեր:

«Եվ օրինակ այս հանձնաժողովը բացահայտելու՞ է, թե ինչպես եղավ, որ հոկտեմբերի 19-ին, երբ պատերազմը կանգնեցնելու առաջարկ էր եղել , պատերազմը այդպես էլ չդադարեցվեց։ Այս հանձ․ պատասխան տալու՞ է, թե ինչպես է եղել, որ շուրջ 7000 վարձկաններ, ինչպես հենց հայտարարում են իրենք, հայտնվել էր արդեն Ադրբեջանի տարածքում եւ մենք, մեր Ազգային անվտանգության ծառայությունը, մեր իրավապահները, մեր իշխանությունները այդ մասին չգիտեին կամ գիտեին եւ լռում էին։ Արդյո՞ք այդ հանձնաժողովը տալու է պատասխաններ, թե մեր Անվտանգության խորհուրդը ինչ էր անում այդ ընթացքում, նիստերի ընթացքում ինչ էր քննարկում եւ այլն», - ասել է պատգամավորը։