Լոռու ոստիկանները ապօրինի ինքնաձիգ ու մարիխուանա են առգրավել

Փետրվարի 11-ին ոստիկանության Լոռու մարզային վարչության, Տարոնի և Սպիտակի բաժինների ծառայողները քրեական գործի շրջանակներում խուզարկություն կատարելու նպատակով այցելել են Վանաձորի Մյասնիկյան փողոցի թիվ 12 շենքի բնակարաններից մեկը։ 34-ամյա տանտերը նախքան խուզարկությունը խորդանոցից իրավապահներին է ներկայացրել «Կալաշնիկովի» ինքնաձիգ և ինքնաձիգի պահունակ՝ լիցքավորված 7,62 մմ տրամաչափի 21 փամփուշտով։

Ոստիկանությունից NEWS.am-ին հայտնում են, որ խուզարկությամբ ավտոտնակում հայտնաբերվել է նույն տրամաչափի փամփուշտ։ Բացի այդ, ավտոտնակի պահարանի վրայից հայտնաբերվել է թղթի մեջ փաթաթված մարիխուանայի նմանվող զանգված՝ 14 գրամից ավելի քաշով: Տղամարդը հայտնել է, որ այն թմրամիջոց է: Զենք-զինամթերքի կապակցությամբ էլ ասել է, որ դրանք պատկանել են հանգուցյալ պապին։

Նշանակվել են փորձաքննություններ:

Հարուցված քրեական գործի նախաքննությունը շարունակվում է։