ԴՆԹ-ն եւ քոլեջի ուսանողն օգնել են բացահայտել 1964 թվականին կատարված 9-ամյա աղջկա բռնաբարության եւ սպանության դեպքը

Ոստիկանությունը բացահայտել է 58-ամյա վաղեմության բռնաբարության եւ սպանության դեպքը, որը ցնցել էր Փենսիլվանիայի հանքարդյունաբերական քաղաքը, քոլեջի 20-ամյա ուսանողի ԴՆԹ-ի օգնությամբ:

Նահանգի ոստիկանությունը դուրս է բերել գերեզմանից մարդասպանի դին եւ պարզել, որ նրա ԴՆԹ-ն համապատասխանում է այն ԴՆԹ-ին, որը մնացել էր 9-ամյա Մերիս Էն Չիվերելլայի վերարկուին, ով առեւանգվել էր 1964 թվականի մարտի 18-ին դպրոց գնալու ճանապարհին: Ոստիկանությունը հայտնել է, որ նրա դին հայտնաբերվել էր ավելի ուշ նույն օրը ածխահորում այն ​​բանից հետո, երբ նրան բռնաբարել եւ խեղդամահ էին արել:

Մարդասպանը նույնականացվել էր որպես Ջեյմս Փոլ Ֆորտե՝ բռնի սեռական ոտնձգությունների պատմություն ունեցող բարմեն, ով մահացել էր բնական մահով 1980 թվականին 38 տարեկանում:

Ֆորտեն, ով 22 տարեկան էր, երբ սպանել էր Մարիսին, հայտնի կապեր չուներ աղջկա կամ նրա ընտանիքի հետ:

Մերիսի սպանությունից հետո գրեթե վեց տասնամյակի ընթացքում այս կամ այն ժամանակահատվածում գործով զբաղվել է բաժնի ավելի քան 230 աշխատակից: Սակայն Ֆորտեի անունը չէր նշվում մինչեւ 2020 թվականը, երբ ԴՆԹ տեխնոլոգիան բացահայտեց կապը:

20-ամյա Էրիկ Շուբերտը քոլեջի ուսանող եւ գենետիկ ծագումնաբանության փորձագետ, ցանկություն էր հայտնել աշխատել այս գործի վրա: Նա ընդարձակ տոհմածառ էր կազմել եւ օգնել ոստիկանությանը նեղացնել կասկածյալների ցուցակը։

Շուբերտը, ով Փենսիլվանիայի Էլիզաբեթթաունի քոլեջի պատմության մասնագետ է եւ ES Genealogy ընկերության սեփականատերը, օգնում էր ոստիկանության այլ բաժիններին ԴՆԹ թեստի եւ ավանդական ծագումնաբանական հետազոտությունների համակցության՝ գենետիկական ծագումնաբանության միջոցով:

Նա առաջարկել էր աշխատել գործի վրա՝ կարդալով Մերիսի պատմությունը, եւ Փենսիլվանիա նահանգի ոստիկանությունը զարմանալիորեն համաձայնվել էր։ Նա գործի վրա աշխատել էր հաջորդ երկու տարին։ «Այս հետաքննությունը, հավանաբար, ամենադժվար ծագումնաբանական խնդիրն է, որին ես երբեւէ բախվել եմ: Դա երեւի ամենադժվար բանն էր, որ երբեւէ արել եմ իմ ամբողջ կյանքում»,- ասել է Շուբերտը մամուլի ասուլիսին։ Շուբերտի խոսքով՝ ինքը «գիտեր, որ որ հանցագործը գտնվելու է»: