Իսրայելն առաջին երկիրն է, որ թույլ է տվել մեծ անօդաչուներ օգտագործել քաղաքացիական օդային տարածքում

Իսրայելն առաջին երկիրն է դարձել, որը թույլ է տվել մեծ անօդաչուներն օգտագործել քաղաքացիական օդային տարածքում, գրում է Times of Israel-ը։

Տրանսպորտի նախարարությունը արտոնագրել է Elbit պաշտպանական կապալառուի StarLiner անօդաչու թռչող սարքը քաղաքացիական օդային տարածքում թռչելու համար։

Քաղաքացիական ավիացիայի վարչությունը դեկտեմբերի վերջին, գնահատման ավելի քան վեց տարվանից հետո, թույլատրել է դրանց թռիչքը։

«Մենք հպարտ ենք, որ արտոնագիր ենք տալիս Hermes Starliner անօդաչուին՝ թույլատրելով դրա թռիչքը քաղաքացիական օդային տարածքում՝ ինչպես ցանկացած այլ քաղաքացիական ինքնաթիռ։ Որքան հայտնի է, սա աշխարհում նման առաջին դեպքն է»,- ասել է Իսրայելի քաղաքացիական ավիացիայի վարչության ղեկավար Ջոել Ֆելդշուն։

Ներկայում գոյություն ունեցող անօդաչու սարքերից շատերը չունեն աշխատանքի անհրաժեշտ տվիչներ քաղաքացիական օդային տարածքում աշխատելու համար, որպեսզի չխանգարեն մյուս ինքնաթիռներին։ Արդյունքում՝ շատ երկրներում գործում են քաղաքացիական օդային տարածքում մեծ բարձրությունների հասնող հզոր անօդաչուների թռիչքն արգելող օրենքներ։

Elbit StarLiner անօդաչուն Hermes 900-ի վերափոխված տարբերակն է, որն օգտագործվում է զինվորականների կողմից ամբողջ աշխարհում։ Այն ստեղծվել է քաղաքացիական ավիացիայի պահանջներին համապատասխանելու համար եւ տվիչների տեղադրման միջոցով նույնականացնում է մյուս ինքնաթիռները, դրանով իսկ կանխվում է դրանց հետ բախումը։

StarLiner-ը նախատեսված է այն բանի համար, որ կառավարություններին եւ անվտանգության ծառայություններին հնարավորություն ընձեռվի հավաքել հետախուզական տվյալներ երկրի ներսում, ինչպես ներքին անվտանգության, այնպես էլ տեղի շրջակա միջավայրին եւ կլիմայական փոփոխություններին հետեւելու նպատակով այն շրջաններում, որտեղ ներկայում անօդաչուները թռչել չեն կարող։

Օրինակ, երբ դեռ չվերափոխված Hermes 900-ն օգտագործվում էր լրացուցիչ անվտանգության ապահովման համար Բրազիլիայում ֆուտբոլի աշխարհի 2014թ. առաջնության ժամանակ, օդային տարածքի մնացած մասը, որտեղ այն պետք է աշխատեր, ազատվում էր ինքնաթիռների թռիչքից։

«Բնակավայրերի վրայով եւ քաղաքացիական ցանկացած օդային տարածքում անօդաչու սարքին տրված թռիչքների թույտվությունը կառավարություններին, ինչպես նաեւ միջազգային եւ առեւտրային կազմակերպություններին հնարավորություն է տալիս օգտագործել մեծ անօդաչու թռչող սարքերը այն առաքելություններում, որոնք մինչ այժմ կատարվում էին միայն օդաչուավոր ինքնաթիռներով»,- ասել են Elbit-ում։

Չնայած արտոնագրումը միայն Իսրայելի օդային տարածքի համար է կատարվել, սպասվում է, որ այն կբարձրացնի քաղաքացիական օդային տարածքում անօդաչուների թռիքչի միջազգային ճանաչման հավանականությունը։