Կինը լճում ներքնակի վրա երկու օր լողալուց հետո ողջ է մնացել

ԱՄՆ-ի բնակչուհուն փրկել են այն բանից հետո, երբ նա երկու օր ներքնակի վրա լողացել է լճում, հայտնում է Complex-ը։

Ըստ ԶԼՄ-ների՝ միջադեպը տեղի է ունեցել Օկլահոմայում։ Կինը եւ նրա զուգընկերը փորձել են ներքնակը որպես լաստանավ օգտագործել, որպեսզի հասնեն Տեքսոմա լճում գտնվող նավակին, բայց ամեն ինչ այլ կերպ է ընթացել:

«Թաց ու մրսած տղամարդը հայտնվել է լճի հարեւանությամբ գտնվող տանը եւ հայտնել կնոջ անհետանալու մասին, որին իբր հոսանքն է տարել»,- ասվում է ոստիկանության հաղորդագրության մեջ։

Կնոջը հայտնաբերել են լճի երկայնքով անցնող գնացքի շնորհիվ։ Ուղեկցորդ Քրիստիան Սոսան եւ ինժեներ Ջասթին Լասթերը տեսել են, որ ամերիկուհին պառկած է ջրի մակերեւույթին եւ ձեռքով է անում։

«Նա օգնություն էր խնդրում, մենք անմիջապես հասկացանք, որ նա հավանաբար վիրավոր է»,- ասել է Քրիստիանը:

Տղամարդիկ զանգահարել են ոստիկանություն եւ հայտնել, թե որտեղ են տեսել կնոջը։ Ոստիկանները 15 րոպե անց դեպքի վայր են ժամանել։ Կնոջ գիտակցությունը նորմալ է եղել, սակայն նրա վերջույթները սկսել են սառցակալել։ Ավելի ուշ շտապօգնության մեքենան ամերիկուհուն տեղափոխել է հիվանդանոց, որտեղ նա դեռ բուժվում է։