Լուկաշենկո. Ոչ մի թեժ պատերազմ չի լինի

Ոչ մի թեժ պատերազմ չի լինի։ Այս մասին այսօր հայտարարել է Բելառուսի նախագահ Ալեքսանդր Լուկաշենկոն, տեղեկացնում է БЕЛТА-ի թղթակիցը։

«Այնքան շատ է ասվում։ Ռազմական, ռազմական, ռազմական... Գուցե, ասում են, ինչ-որ տեղ համը հանել ենք ռազմական այս տերմինների հարցում։ Իսկ մենք, ի՞նչ է, պետք է լռե՞նք։ Որպեսզի հետո, եթե հանկարծ ինչ-որ բան պատահի, ժողովուրդը մեզ ասի. բա դուք որտե՞ղ էիք, ինչո՞ւ մեզ չէիք ասում։ Դրա համար ես անգամ, վերլուծելով իմ քայլերն ու արարքները, հաճախ մտածում եմ. գուցե մենք ավելորդ տեղն ենք մարդկանց այդ մասին ասում։ Բա ինչպե՞ս չասենք, եթե շուրջն այսպիսի իրավիճակ է ստեղծվում։ Ես պարզապես համոզված եմ, որ ոչ մի թեժ պատերազմ չի լինի։

Չափից ավելի ենք վարժվել կոմֆորտին,- ասել է պետության ղեկավարը։- Իսկ կոմֆորտի գոտուց դուրս գալ եւ սկսել կռվել... Ես կարծում եմ, Պավել (Պավել Մուրավեյկո, որը նշանակվել է Անվտանգության խորհրդի պետքարտուղարի տեղակալ), ինձանից վատ չգիտես, թե ինչ է նշանակում կռվել։ Խրամատներում, հաստատ, նստել ես, կրակել, սողացել մարտավարական պարապմունքների ժամանակ եւ այլն»,- տեղեկացնում է БЕЛТА-ն։

«Դրա համար ես կարծում եմ, որ թեժ պատերազմ չի լինի։ Եթե Ուկրաինայում խելքը թռցրած ինչ-որ նացիկներ սադրանք չհրահրեն, չենք կռվի, մենք չենք մոտեցել այդ պատերազմին»,- ասել է Ալեքսանդր Լուկաշենկոն։

Միեւնույն ժամանակ, նա համոզված է, որ ստեղծված իրավիճակի մասին մարդկանց ասել պետք է. «Որպեսզի հասկանան, որ ցանկացած պահի...»։

«Նրանք մեզ տնտղում են (պոտենցիալ հակառակորդները). մեկ ուղղաթիռ է թռնում, մեկ ինքնաթիռ, մեկ անօդաչու։ Էլ չեմ ասում այն մասին, որ մարդիկ այնտեղ սահմանն են անցնում եւ այլն։ Ուստի, ոչ միայն պատերազմ է ընթանում զանգվածային լրատվամիջոցներում, եւ տնտեսական պատերազմ է սանձազերծված մեր դեմ։ Սա հիբրիդային պատերազմ է այդ խռովությունից հետո (խոսքը 2020թ. օգոստոսի իրադարձությունների մասին է)»,- ասել է պետության ղեկավարը։

Դիմելով Պավել Մուրավեյկոյին՝ Ալեքսանդր Լուկաշենկոն նշել է, որ ստիպված են լինելու բանակի գործողությունների լուրջ վերահսկողություն սահմանել. «Ձեզանից բացի ո՞վ պետք է ավելի լավ իմանա, թե ինչ է տեղի ունենում զորքերում։ Բայց այստեղ արդեն դուք չպետք է նրանց մարդը լինեք, ովքեր ձեզ երաշխավորել են։ Դուք արդեն նախագահի մարդն եք, եւ դուք իմ աչքերով պետք է նայեք Զինված ուժերին։ Ոչ միայն բանակին։ Ուստի երեկ նրանք ձեզ երաշխավորեցին, իսկ վաղը պետք է հասկանան, որ դուք պետք է Զինված ուժերի նկատմամբ օբյեկտիվ մարդ լինեք»։