ՀԱՊԿ․ Ուկրաինայի հարավ-արեւելքում էսկալացիայի սպառնալիքը պահպանվում է

Ուկրաինայի հարավ-արեւելքում էսկալացիայի սպառնալիքը պահպանվում է՝ արեւմտյան գործընկերների կողմից Կիեւին սպառազինություն մատակարարելու ֆոնին։ Այս մասին հայտարարել է ՀԱՊԿ միացյալ շտաբի պետ, գեներալ-գնդապետ Անատոլի Սիդորովը, հաղորդում է ՏԱՍՍ-ը։

Նա նշել է, որ ուկրաինական զինված ուժերի զարգացման վրա Արեւմուտքի ազդեցության «բնորոշ ցուցանիշ» է դրանց «համապատասխանեցումը ՆԱՏՕ-ի ստանդարտներին»։

«Նշմարված ծրագրերի իրագործման համար ակտիվորեն ներգրավվում է արտաքին ֆինանսական եւ խորհրդատվական օգնություն, սպառազինության եւ ռազմատեխնիկայի մատակարարման շուրջ գործարքներ են կնքվում։ Այս տարվա հունվարից ԱՄՆ-ն մոտ 650 տոննա ռազմամթերք եւ ռազմական գույք է մատակարարել։ Այս ֆոնին տարածաշրջանային անվտանգության վիճակի վրա շարունակում է էական ազդեցություն ունենալ Ուկրաինայի հարավ-արեւելքում զինված հակամարտությունը»,- ասել է Սիդորովը։

Սիդորովն ընդգծել է, որ այժմ Ուկրաինայում գտնվում են օտարերկրյա զինծառայողներ, ամերիկյան եւ եվրոպական մասնավոր ռազմական ընկերությունների ներկայացուցիչներ, ակտիվորեն ներգրավվում են ենթակառուցվածքները, պարբերաբար մարտական թռիչքներ են իրականացվում, այդ թվում ռազմավարական, ռմբակոծիչ եւ հետախուզական ավիացիայի ներգրավմամբ։

Նա ուշադրություն է հրավիրել Կիեւի կողմից ազգային դիմադրության մասին օրենքի ընդունման վրա, ինչպես նաեւ հիշեցրել Ուկրաինայի նախագահ Վլադիմիր Զելենսկու՝ փետրվարի 1-ին ստորագրված հրամանագիրը երկրի պաշտպանունակության ամրապնդման մասին, ըստ որի՝ նախատեսվում է 3 տարում ավելացնել Ուկրաինայի ԶՈւ թվաքանակը 100 հազարով եւ ստեղծել 20 հավելյալ ռազմական բրիգադ։ «2022 թվականին նախատեսվում է ավելացնել պաշտպանական ծախսերը եւ անվտանգությունն ավելի քան 30%-ով։ Այս ամենը վկայում է երկրի ղեկավարության մոտ հարավ-արեւելքում հակամարտությունը խաղաղ կարգավորելու ձգտման բացակայության մասին»,- հավելել է ՀԱՊԿ միացյալ շտաբի պետը։