Ադրբեջանի իշխանությունը թաքցնում է զինվորի սպանությունն օկուպացված Քարվաճառում

Ադրբեջանի իշխանությունը թաքցնում է զինվորի սպանությունն օկուպացված Քարվաճառում։

Ինչպես հայտնում է Turan-ը, հունվարի 8-ին Ադրբեջանի Մասալինի շրջանի Արքիվան գյուղի բնակչուհի Սարիյա Զոհրաբովան արդարադատության նախարարության շենքի դիմաց միանձնյա պիկետ է իրականացրել՝ պահանջելով հետաքննել իր որդու սպանությունը։ Ղարաբաղյան պատերազմի մասնակից, ժամկետային զինծառայող Իլքին Զոհրաբովը մահացել է չպարզված հանգամանքներում Քարվաճառում, որն ադրբեջանցիներն անվանում են Քյալբաջար։ 2001թ․ ծնված Զոհրաբովը 8 օրից պետք է զորացրվեր։ Սակայն 2021 թվականի մարտի 22-ին ինքնասպան է եղել, պնդում է ռազմական քննությունը՝ նշելով, որ վերջինիս ինքնասպանության են հասցրել վառատար Մաթլաբ Հաջիեւի կողմից խոշտանգումները։

Քրեական գործում կան նաեւ ենթակաների նկատմամբ Հաջիեւի կողմից ֆիզիկական ուժի կիրառման վկայություններ։ Նա ձերբակալվել է՝ ներգրավվելով որպես մեղադրյալ։ Զինվորի մարմինը փոխանցվել է ընտանիքին մարտի 30-ին։

Ընտանիքը կարծում է, որ Հաջիեւը կարող էր մեղավոր լինել որդու մահվան մեջ։ Ինչպես գործակալությանն ասել է Սարիյա Զոհրաբովան, փամփուշտը մտել է որդու մեջքի, այլ ոչ թե կրծքավանդակի մեջ։ «Թող ինձ ցույց տան՝ ինչպես կարող է մարդ ինքնասպան լինել՝ կրակելով իր մեջքին»,- ասել է նա։

«Մենք արդար հետաքննություն ենք ուզում։ Ռազմական դատախազը եւ քննիչը գործը տանում են դեպի ինքնասպանություն, սակայն մենք դրան չենք հավատում։ Թող գործը վերադարձնեն հավելյալ հետաքննության համար»,- հավելել է նա։

«11 ամիս Տերտերի ռազմական դատարանում շարունակվում է վերոնշյալ գործով քննությունը։ Կան բազմաթիվ փաստեր, որոնք հերքում են քննության վարկածը։ Մեր միջնորդությունները մերժվել են։ Պահանջում ենք հավելյալ հետաքննություն»,- գործակալությանն ասել է սպանվածի հորեղբայրը։

Turan-ը կապ է հաստատել փաստաբան, հանրային պաշտպան Յուսիֆ Ալիեւի հետ։ Վերջինիս խոսքով՝ մահացածի մարմնի զննությունը հերքում է քննության վարկածը։ Փամփուշտը դիպել է մեջքին, իսկ ինքնասպանություն գործած անձը չէր կարող նման կերպ վերջ դնել կյանքին։

Չկան բալիստիկ փորձաքննության տվյալներ, առկա չեն նաեւ դեպքի վայրից փամփուշտները, եւ պարզ չէ՝ ինչ զենքով է կրակոցն իրականացվել։ Զորամասում պնդում են, որ Իլքինը զենք չի ունեցել՝ չնայած ծառայել է հայկական դիրքերից 150 մետր հեռավորության վրա գտնվող մարտական դիրքում։ Նրա մարմնի վրա վիրահատության հետքեր են հայտնաբերվել՝ թեպետ մինչ այդ նա չի վիրահատվել։

Ի վերջո, ամենակասկածելին մահացածի ձեռքի վրա գրությունն է։ Ենթադրվում է, որ մահից 11 օր առաջ Իլքինը ձեռքի վրա կտակ է գրել՝ խնդրելով իրեն թաղել հորեղբոր գերեզմանի մոտ։ Ձեռագիրը տարբերվել է տուն ուղարկված նամակներում ձեռագրից, եւ գրությունն արվել է ոչ այն գրիչով, որն ուներ մահացածը։ Ընտանիքում կասկածում են, որ դա արել է մեկ այլ մարդ, զինվորի մահից հետո, որպեսզի քննությանը համոզի, որ ինքնասպանություն է եղել։