Ադրբեջանի նախագահը ԶԼՄ-ների իրավունքները սահմանափակող օրենք է ստորագրել

Ադրբեջանի նախագահ Իլհամ Ալիեւը փետրվարի 8-ին հաստատել է «Մեդիաների մասին» սկանդալային օրենքը, որն ընդունվել է երկրի խորհրդարանի կողմից անցյալ տարվա դեկտեմբերի 30-ին։

Ինչպես հաղորդում Է Turan-ը, Ալիևը նաեւ հրամանագիր է ստորագրել «Մեդիաների մասին» օրենքի կիրառման եւ դրանից բխող մի շարք հարցերի կարգավորման մասին։

Այսպես, փաստաթղթով նախատեսվում է մեդիաների ռեեստր ստեղծել։

Մեդիաների զարգացման գործակալությանը հանձնարարվել է վեց ամսվա ընթացքում ապահովել մեդիաների ռեեստրի ստեղծումը եւ այն ներառել էլեկտրոնային կառավարության տեղեկատվական համակարգում։

Լուծարվում է նաեւ Հեռուստատեսության եւ ռադիոյի ազգային խորհուրդը եւ դրա փոխարեն ստեղծվում է Տեսալսողական խորհուրդ։

Բացի այդ, նախագահը հանձնարարել է կառավարությանը երկու ամսվա ընթացքում պատրաստել եւ նախագահին ներկայացնել «Մեդիաների մասին» օրենքի խախտման համար վարչական պատասխանատվության միջոցներ սահմանող օրինագիծ:

Նախատեսվում է, որ օտարերկրյա լրագրողների հավատարմագրումն իրականացնելու է Ադրբեջանի ԱԳՆ-ն։ Նրանք կարող են իրենց գործունեությանն անցնել միայն ԱԳՆ-ի համաձայնությունը ստանալուց հետո։

Միեւնույն ժամանակ Ալիեւը Մեդիայի զարգացման գործակալության կանոնադրության մեջ փոփոխությունների ներառման մասին հրամանագիր է ստորագրել։

Մասնավորապես, գործակալությունն իրավունք ունի այդ օրենքի խախտման համար նախազգուշացումներ տալու տպագիր եւ առցանց լրատվամիջոցների սուբյեկտներին, կասեցնելու նրանց գործունեությունն ու նրանց արտադրանքի տարածումը, ինչպես նաեւ հայցեր ներկայացնելու դատարան՝ ԶԼՄ-ների մարմինների գործունեությունը դադարեցնելու համար։

Գործակալությունը ստանում է մեդիաների ռեեստրի վարման, մեդիաների մարմիններին ռեեստրում ներառելու մասին վկայականի տրամադրման, իսկ լրագրողներին՝ լրագրողական վկայականների տրամադրման իրավունք։

Գործակալությունն օժտված է նաեւ մեդիաների ռեեստրում ընդգրկված տպագիր եւ առցանց մեդիաների խմբագրության տարբերանշանի (խորհրդանշանի) փոփոխման համաձայնություն տալու լիազորություններով։

Բացի այդ, գործակալությունը յուրաքանչյուր տարի կհայտարարի հաջորդ տարվա կարեւոր միջոցառումների ցանկը, այն կտեղադրի իր պաշտոնական կայքում եւ պարբերաբար կթարմացնի այն։

Ադրբեջանի սահմաններից դուրս գտնվող մեդիաների սուբյեկտների գործունեության մեջ «Մեդիաների մասին» օրենքի պահանջների խախտումների բացահայտման դեպքում գործակալությունը կիրականացնի Ադրբեջանի միջազգային պայմանագրերով եւ ազգային օրենսդրությամբ նախատեսված միջոցառումներ: Օրենքի այդ պահանջները վերաբերում են այն տեղեկատվական հարթակներին, որոնց թիրախային լսարանը գտնվում է Ադրբեջանում։

Այն դեպքերում, եթե դա նախատեսված չէ միջազգային պայմանագրերով, որոնց կողմ է հանդես գալիս Ադրբեջանը, գործակալությունը կլուծի Ադրբեջանի տարածքում արտասահմանյան տպագիր ԶԼՄ-ների արտադրանքի տարածման հետ կապված հարցերը, որոնց խմբագրությունների մշտական գտնվելու վայրը Ադրբեջանի սահմաններից դուրս է։

Նշենք, որ մեդիաների մասին նոր օրենքը քննադատություն է առաջացրել լրագրողական հանրության եւ միջազգային կազմակերպությունների բազմաթիվ ներկայացուցիչների մոտ՝ ոլորտի պետական կոշտ կարգավորման համար: Օրենքի դրույթները լայն մեկնաբանություն ունեն, ինչը ճանապարհ է բացում նրա ազատ մեկնաբանման համար։

Օրենքը ստորագրվել է նախագահի կողմից՝ չնայած օրենքի ակնհայտ հակասությանը երկրի Սահմանադրությանը եւ Մարդու իրավունքների միջազգային կոնվենցիային: Այդ հակասությունները մատնանշվել են Ադրբեջանի նախագահին ուղղված լրագրողական հանրության եւ միջազգային սուբյեկտների ուղերձում ՝ օրենքը լրամշակման վերադարձնելու կոչով։ Օրենքը ներկայումս ուսումնասիրվում է Վենետիկի հանձնաժողովի կողմից։