Meta-ն վստահեցրել է, որ չի պատրաստվում հրաժարվել Եվրոպայում իր ծառայություններից

Meta-ն վստահեցրել է, որ չի պատրաստվում հրաժարվել Եվրոպայում իր ծառայություններից՝ ԱՄՆ-ին եվրոպական տվյալների փոխանցման շուրջ շարունակվող վեճի պայմաններում:

Տվյալները կենտրոնական տեղ են զբաղեցնում գովազդային բիզնեսում, որը ստեղծում է ընկերության գրեթե ողջ միլիարդավոր դոլարների եկամուտը, եւ կառույցները, որոնք վերահսկում էին տեղեկատվության փոխանցումը մայրցամաքից, այժմ անորոշ վիճակում են:

«Մենք Եվրոպայից հեռանալու ցանկություն կամ պլաններ բացարձակ չունենք, բայց պարզ իրականությունն այն է, որ Meta-ն եւ շատ այլ ձեռնարկություններ, կազմակերպություններ եւ ծառայություններ հիմնվում են ԵՄ-ի եւ ԱՄՆ-ի միջեւ տվյալների փոխանցման վրա՝ համաշխարհային ծառայությունների գործարկման համար»,- ասվում է ընկերության հաղորդագրության մեջ:

Եվրոպայի եւ Միացյալ Նահանգների միջեւ Privacy Shield առցանց տվյալների որոշիչ համաձայնագիրն անվավեր է ճանաչվել 2020 թվականի հուլիսին՝ ԵՄ բարձրագույն դատարանի որոշմամբ։

Meta-ն նաեւ ծանուցել է ԱՄՆ շուկայի կարգավորող մարմիններին, որ տվյալների փոխանցման համար օգտագործվող բազաները նույնպես իրավական եւ նորմատիվ բնույթի վտանգի տակ են:

«Եթե տվյալների փոխանցման անդրատլանտյան նոր համակարգը չընդունվի… մենք, ամենայն հավանականությամբ, չենք կարողանա Եվրոպայում առաջարկել մեր ամենակարեւոր ապրանքներն ու ծառայությունները, ներառյալ Facebook-ը եւ Instagram-ը,»,- ասվում է Արժեթղթերի եւ բորսաների հանձնաժողովին Meta-ի հայտարարության մեջ:

Եվրոպական իշխանությունները եւ ԱՄՆ կառավարությունը դեռեւս քննարկում են խնդրի լուծման ուղիները։

Սոցիալական ցանցերի հսկան վերջերս ապրել է շուկայական արժեքի ամենավատ անկումը եռամսյակային հիասթափեցնող արդյունքներից հետո, որոնք հարցեր են առաջացրել նրա ապագայի վերաբերյալ:

2021-ի վերջին Facebook-ում օգտատերերի թվի օրական ոչ մեծ անկում է դիտարկվել ամբողջ աշխարհում, ինչը առաջին նման անկումն է դարձել։