Փետրվարի 10-20-ը Ուկրաինայում զորավարժություններ կանցկացվեն Bayraktar-ի, Javelin-ի և NLAW-ի կիրառմամբ

Փետրվարի 10-20-ը Ուկրաինայում զորավարժություններ կանցկացվեն Bayraktar-ի, Javelin-ի եւ NLAW-ի կիրառմամբ։ Միաժամանակ, Բելառուսն ու Ռուսաստանը կանցկացնեն իրենց համատեղ զորավարժությունները։ Այս մասին ICTV հեռուստաալիքի «Խոսքի ազատություն» հաղորդաշարի եթերում հայտարարել է Ուկրաինայի պաշտպանության նախարար Ալեքսեյ Ռեզնիկովը, փոխանցում է ZN.ua-ն։

«Այո, իսկապես, փետրվարի 10-ից 20-ը նրանք զորավարժություններ են անցկացնելու։ Ուկրաինայի զինված ուժերը եւս աշխատում են։ Եվ այսօր մենք զուգահեռ զորավարժություններ ենք անցկացնում։ Ես կնշեմ այն ​​վայրերը, որտեղ դրանք տեղի կունենան։ Դրանք են՝ Ռովնո, Կովել, Օվրուչ, Շիրոկի լան, Օլեշկովսկի ավազներ, Չուգուեւ, Չեռնիգով, Սումի, Օդեսա: Սրանք միայն հրաձգարաններ են։ Բացի այդ, կան առանձին հատվածներ, առանձին վայրեր, որտեղ, ի թիվս այլնի, փետրվարի 10-ից մինչեւ փետրվարի 20-ը կանցկացվեն Ուկրաինայի Զինված ուժերի զորավարժություններ՝ ուկրաինական Bayraktar-ի, ուկրաինական Javelin-ի եւ NLAW-ի կիրառմամբ, որը մենք վերջերս ստացել ենք Բրիտանիայից»,- ասել է Ռեզնիկովը։

Նրա խոսքով՝ այսօրվա դրությամբ Ուկրաինայի հետ բոլոր սահմանների երկայնքով Ռուսաստանի Դաշնությունից, Բելառուսից եւ ժամանակավոր օկուպացված տարածքներից գտնվում է ցամաքային զորքերի 119 հազար զինծառայող։

«Եթե ավելացնենք օդային եւ ծովային բաղադրիչը, կկազմի 140 հազար։ Դրանք 72 մարտավարական գումարտակային խմբերն են, որոնցից 11-ը գտնվում է Բելառուսի Հանրապետությունում»,- հստակեցրել է նախարարը։