«ԱՊՊԱ-ի եղած սակագներն արդեն համարժեք չեն եղել՝ ապահովելու հատուցումները». Ավտոապահովագրողների բյուրոյի տնօրեն

ԱՊՊԱ ոլորտի թանկացումները պայմանավորված են տվյալ ծառայության ինքնարժեքով, որի հիմնական մասը հատուցումներն են։ Այս մասին, այսօր՝ փետրվարի 7-ին, ԱՊՊԱ-ի վճարների դեմ բողոքի ակցիա իրականացնող վարորդների հետ հանդիպման ժամանակ նշեց Ավտոապահովագրողների բյուրոյի գործադիր տնօրեն Վաղինակ Եղիազարյանը։

«Հատուցումների ծավալն աճել է վերանորոգումների, պահեստամասերի գների աճի որոշ կարգավորումների արդյունքով, որի պատճառով երբևէ չվերանայված սակագներն արդեն համարժեք չեն եղել՝ ապահովելու հատուցումները»,-ասաց նա:

Ակցիայի մասնակիցներից մեկը նկատեց, որ եթե հաշվի են առել, օրինակ, պահեստամասերի թանկացումները, ինչու՞ ոչ մի կերպ չեն դիտարկել նաև քաղաքացու շահերը։ «Տպավորություն է, որ ամեն ինչ կատարվել է միակողմանի, ոչ մի կերպ վարորդի շահերը չեն պաշտպանվել»,-ասաց վարորդը։

Եղիազարյանն արձագանքեց՝ եթե հատուցումների արժեքներն ավելանում են, սակայն սակագինը մնում է նույնը, շահերը հաշվի առնելու ի՞նչ տարբերակ կար, ինչ-որ տեղից պետք է գումար ավելացվեր։ Բյուրոյի գործադիր տնօրենն ընդգծեց՝ քաղաքական որոշում չի կայացվել և չէր էլ կարող կայացվել, եղել է կոնկրետ որոշում՝ հիմնված հաշվարկի վրա։

Վարորդներից մեկը հայտարարեց, թե մի խումբ վարորդների անունից, անվստահության հիմքով պահանջում են Եղիազարյանի հրաժարականը, ինչին վերջինս արձագանքեց․ «Բյուրոյի որոշումն ընդունվում է խորհրդի կողմից, որտեղ կան հասարակական կազմակերպությունների, ապահովագրական ընկերությունների ներկայացուցիչներ, ԿԲ ներկայացուցիչ։ Որոշումները քննարկվում են։ Դուք էլ որ հրաժարական եք պահանջում, ես ո՛չ հանրապետության նախագահն եմ, ո՛չ էլ վարչապետն եմ․ լավ եք անում՝ պահանջում եք, իսկ դուք այլ կազմակերպությունների տնօրենների հրաժարական պահանջու՞մ եք»:

Ավելի վաղ NEWS.am-ը հայտնել էր, որ վարորդներն այսօր՝ փետրվարի 7-ին հերթական բողոքի ակցիան են իրականացրել ԱՊՊԱ վճարների բարձրացման դեմ, որն ուժի մեջ է մտնում այսօրվանից: Նրանք հավաքվել են Շահումյան հրապարակից, որտեղից երթով շարժվել են դեպի ապահովագրական բյուրո:

Հունվարի 31-ին եւ փետրվարի 3-ին եւս վարորդները բողոքի ակցիա էին իրականացրել Հանրապետության հրապարակում եւ ԿԲ շենքի մոտ՝ իրենց բողոքն արտահայտելով ԱՊՊԱ վճարների թանկացման դեմ: Նրանք իրենց մեքենաներով ազդանշանները միացրած պտտվել էին Հանրապետության հրապարակում: Ոստիկանները երկու դեպքում էլ բերման էին ենթարկել վարորդներից մի քանիսին:

Նշենք, որ ԱՊՊԱ վճարների թանկացման վերաբերյալ կարգավորումներն ուժի մեջ են մտնում այսօրվանից: Ըստ այդ փոփոխությունների ԱՊՊԱ-ի վճարը թանկանում է 3 հազար դրամով: Բացի դրանի, եթե վթար է լինում, որի վնասը անցնում է 1 մլն դրամից, ապա վճարը 300 տոկոսով թանկանում է: