ԱՄՆ հետախուզական համայնքը զեկույց է հրապարակել «Հավանայի համախտանիշի» մասին

ԱՄՆ հետախուզական համայնքի ղեկավարության հրապարակած զեկույցում ասվում է, որ ԱՄՆ-ի ավելի քան 1000 դիվանագետներից եւ հետախուզական պաշտոնյաներից շատերը, ովքեր տառապել են առեղծվածային հիվանդությամբ, որը հայտնի է որպես «Հավանայի համախտանիշ», կարող էին տուժած լինել իմպուլսային էլեկտրամագնիսական էներգիայի օգտագործումից, հայտնում է «Ամերիկայի ձայնը»:

«Իմպուլսային էլեկտրամագնիսական էներգիան, հատկապես՝ ռադիոհաճախականության տիրույթում, խելամիտ բացատրություն է» ականջի ցավի, գլխապտույտի եւ «Հավանայի համախտանիշի» մյուս ախտանիշների համար, որոնք այդպես են անվանվել, քանի որ Հավանայում ԱՄՆ դեսպանատունն առաջինն էր հայտնել առեղծվածային ախտանիշների մասին:

Զեկույցը պատրաստած փորձագետների խումբը գլխավորում էին Ազգային հետախուզության տնօրեն Ավրիլ Հեյնսը եւ ԿՀՎ փոխտնօրեն Դեյվիդ Քոենը։ Տուժած մարդկանցից մի քանիսի ախտանիշների համակցությունը «դժվար է բացատրել հայտնի բնական կամ բժշկական պատճառներով», ասվում է զեկույցում: Զոհերի ընդհանուր թիվը չի արտացոլվել զեկույցի գաղտնազերծված ամփոփագրում։

Փաստաթղթում նշվում է, որ «Հավանայի սինդրոմի» դեպքեր են գրանցվել նաեւ Ռուսաստանում, Չինաստանում, Տաջիկստանում եւ աֆրիկյան որոշ երկրներում։

Փորձագետների եզրակացությունները կրկնում են Գիտությունների ազգային ակադեմիայի 2020 թվականի ուսումնասիրության արդյունքները: ԿՀՎ-ն հունվարի 20-ին հետաքննության ընթացքի վերաբերյալ միջանկյալ զեկույց էր հրապարակել, որում ասվում է, որ այսպես կոչված «առողջական անոմալ միջադեպերի» մեծ մասի հետեւում կանգնած է Ռուսաստանը կամ այլ օտարերկրյա ուժ։ ԿՀՎ-ի զեկույցում նշվում է նաեւ, որ շուրջ երկու տասնյակ գործեր դեռեւս պարզված չեն։

Չորեքշաբթի հրապարակված զեկույցի հեղինակները ոչ մեկին չեն մեղադրում էլեկտրամագնիսական էներգիայի օգտագործման համար։ Փորձագետների կողմից արված եզրակացությունները, ամենայն հավանականությամբ, հիասթափություն կառաջացնեն ԱՄՆ կառավարության աշխատակիցների մոտ, ովքեր տառապում էին «Հավանայի համախտանիշով» եւ դեռեւս իրենց խրոնիկական հիվանդությունների հստակ բացատրությունը չեն ստացել:

«Մենք չենք վերագրել այն օտարերկրյա հակառակորդին կամ որեւէ մասնավոր անձի։ Մենք հետնել ենք պատճառահետեւանքային մեխանիզմին»,- լրագրողներին ասել է ԱՄՆ հետախուզության աշխատակիցը, ով ծանոթ է զեկույցի ամբողջական բովանդակությանը:

Հիմնվելով բժշկական զեկույցների եւ բժիշկների եւ տուժածների հետ հարցազրույցների վրա՝ հանձնաժողովը եզրակացրել է, որ ախտանիշներն «իրական եւ համոզիչ» են:

Գտնելով, որ «իմպուլսային էլեկտրամագնիսական էներգիան» կարող է լինել հիվանդության պատճառը, հանձնաժողովն ասել է, որ «կան տեղեկատվական բացեր», բայց կա այդպիսի էներգիայի ստեղծման մի քանի հավանական ուղի:

Զեկույցում ասվում է իմպուլսային էլեկտրամագնիսական էներգիայի աղբյուրների առկայության մասին, որոնք բավականին հեշտ է թաքցնել։ Էներգիան կարող է տարածվել «ոչ ստանդարտ ալեհավաքների» միջոցով, որոնք ազդանշաններ են արձակում, որոնք «շինարարական միջով» ներթափանցում են փակ տարածքներ:

Զեկույցում նշվում է, որ մարդիկ, ովքեր պատահաբար էլեկտրամագնիսական ազդանշանների են ենթարկվել, այդ թվում՝ ռադիոալիքների, միկրոալիքների եւ ռենտգենյան ճառագայթների, հայտնել են «Հավանայի համախտանիշի» ախտանիշների նման զգացողությունների մասին:

«Հավանայի համախտանիշի» պատճառ կարող է լինել նաեւ ուլտրաձայնը, սակայն դրա համար տուժածը պետք է մոտ լինի ճառագայթին, քանի որ ուլտրաձայնը «լավ չի տարածվում օդում եւ շինարարական նյութերում», ասվում է զեկույցում։

Հոգեսոցիալական գործոնները, այդ թվում՝ աշխատանքի պահանջները, սթրեսը եւ դեպրեսիան, ինքնին չեն կարող բացատրել Հավանայի համախտանիշի հիմնական ախտանիշները: