Ամերիկյան մոտ 8500 զինծառայողներ մարտական պատրաստվածության են բերվել՝ Ուկրաինայի շուրջ իրավիճակի սրման հետ կապված

Ամերիկյան մոտ 8500 զինծառայողներ հունվարի 24-ի երեկոյան մարտական պատրաստվածության են բերվել Ուկրաինայի շուրջ իրավիճակի սրման հետ կապված: Այս մասին հայտարարել է Պենտագոնի ներկայացուցիչ Ջոն Քիրբին, հայտնում է CNN-ը։

ԱՄՆ պաշտպանության նախարար Լլոյդ Օսթինը նախագահ Ջո Բայդենի ցուցումով տեղակայմանը նախապատրաստվելու հրաման է տվել։ Քիրբին ասել է, որ զորքերի տեղակայման վերաբերյալ վերջնական որոշում դեռ չի կայացվել։

Երկուշաբթի ավելի վաղ CNN-ը հայտնել էր, որ Բայդենի վարչակազմը գտնվում է Արեւելյան Եվրոպա ուղարկվելիք հատուկ ռազմական ստորաբաժանումների որոշման վերջին փուլում:

Ըստ բարձրաստիճան պաշտոնյայի՝ շաբաթ օրը Քեմփ Դեւիդում կայացած ճեպազրույցի ընթացքում Բայդենը բարձրաստիճան զինվորականների հետ քննարկել է Բալթյան եւ արեւելաեվրոպական երկրներում ԱՄՆ զորքերի քանակի ավելացման տարբերակները:

Բայդենը հայտարարել է, որ տեսազանգ կունենա եվրոպացի առաջնորդների հետ, որը Սպիտակ տան կարծիքով՝ վարչակազմի խորհրդակցությունների եւ եվրոպացի դաշնակիցների հետ համակարգման մի մասն է՝ ի պատասխան «ռուսական ռազմական հզորացման աճի»:

Արեւելյան Եվրոպա ռազմական ուժեր ուղարկելու նպատակը դաշնակիցներին զսպող միջոցներ տրամադրելն ու հանգստացնելն է, սակայն որեւէ ենթադրություն չկա, որ ամերիկյան զորքերը կտեղակայվեն Ուկրաինայում կամ կմասնակցեն որեւէ ռազմական գործողության: