Չեռնոգորիայի վարչապետը կհարցաքննվի 500 կգ կոկաինի գործով

Չեռնոգորիայի խորհրդարանի անվտանգության եւ պաշտպանության հանձնաժողովը կհարցաքննի երկրի վարչապետ Զդրավկո Կրիվոկապիչին եւ փոխվարչապետ Դրիտան Աբազովիչին Բար քաղաքի նավահանգստում բանանի արկղերում 500 կգ կոկաին հայտնաբերելու գործի շուրջ: Այդ մասին ուրբաթ հայտարարել է երկրի ազգային հեռուստատեսությունը, հաղորդում է ՏԱՍՍ-ը:

Կհարցաքննվեն նաեւ ոստիկանության, դատախազության եւ Չեռնոգորիայի ազգային անվտանգության ղեկավարները: Որոշումն ընդունվել է պատգամավորների կողմից միաձայն:

Ավելի վաղ Vijesti թերթը տեղեկացրել է, որ Չեռնոգորիայի մաքսայինները հայտնաբերել են Բար քաղաքի նավահանգստում ավելի քան 500 կգ կոկաին բանանի արկղերում, որը նախատեսված էր Voli սուպերմարկետների համար: Մաքսայիններն ահազանգել են իրենց գտածոյի մասին Չեռնոգորիայի հատուկ պետական դատախազությանն ու ոստիկանությանը: Դատախազությունը հայտնել է, որ առաջիկայում ակնկալվում է բերման ենթարկել բոլոր նրանց, ովքեր կապված են մաքսանենգության հետ: Կոկաինը ժամանել էր երկիր հունվարի 2-ին, իսկ մաքսայինները հայտնաբերել էին այն հունվարի 12-ին:

Դա առաջին դեպքը չէ, երբ Չեռնոգորիայում Voli ընկերության բեռներում թմրանյութեր են հայտնաբերվում: 2018 թվականի հունիսին 7 միլիոն դոլար արժողության 35 կգ կոկաին է հայտնաբերվել բանաններով կոնտեյներում, որոնք նախատեսված էին այդ ցանցի համար: 2014 թվականին Չեռնոգորիայի ոստիկանները հայտնաբերել էին Էվադորից համանման կոնտեյներում 250 կգ կոկաին: