Ավստրիայի իշխանությունները մինչեւ 1500 եվրոյի վիճակախաղ կանցկացնեն կորոնավիրուսի դեմ պատվաստվածների համար

Ավստրիայի կառավարությունը սոցիալ-դեմոկրատների հետ պայմանավորվել է պատվաստվածների համար վիճակախաղ անցկացնել, որում հնարավոր կլինի շահել մինչեւ երեք 500 եվրո արժողությամբ վաուչեր, գրում է Krone-ն։ Հունվարի 20-ին վիճակախաղի մասին հայտարարել է կանցլեր Կառլ Նեհամերը։

Մրցանակների եւ պատվաստումը խթանող այլ միջոցառումների խաղարկությունը խորհրդարանը կքննարկի նույն օրը՝ COVID-19-ի դեմ պարտադիր պատվաստման մասին օրինագծի մի փաթեթում։

Վիճակախաղին մասնակցելու հնարավորություն կունենան բոլորը, ովքեր ընդգրկված են պատվաստվածների էլեկտրոնային ռեգիստրում, այդ թվում՝ պատվաստանյութի միայն առաջին չափաբաժինը ստացածները։ Հաղթելու հնարավորություն կունենա յուրաքանչյուր տասներորդը։ Խաղարկությունները կանցկացվեն ֆիքսված օրերին՝ հեռուստատեսային հեռարձակմամբ՝ մարտի 15-ից մինչեւ դեկտեմբերի վերջը, հայտնում է «Ինտերֆաքսը»։

Վաուչերները հնարավոր կլինի մարել մանրածախ խանութներում, հասարակական սննդի, մշակութային եւ սպորտային հաստատություններում, ինչպես նաեւ Ավստրիայի հյուրանոցներում։ Այս կերպ իշխանությունները նախատեսում են աջակցել երկրի փոքր բիզնեսին, որը զգալիորեն տուժել է համավարակից։

Բացի այդ, կառավարությունը քաղաքապետարաններին խոստացել է սուբսիդիաներ, որոնց չափը կախված կլինի պատվաստումների մակարդակից։

Ընդհանուր առմամբ, պատվաստումների խրախուսման ծրագրին մոտ 1,4 մլրդ եվրո կհատկացվի։