Ինդոնեզիայի նահանգներից մեկում կնոջը 100 անգամ մտրակել են անհավատարմության համար

Ինդոնեզիայի նահանգներից մեկում կնոջը 100 անգամ մտրակել են անհավատարմության համար, մինչդեռ նրա սիրեցյալը, ով հերքել է մեղադրանքները, մտրակի 15 հարված է ստացել։

Աչեհի նահանգի դատախազության գլխավոր քննչական բաժնի ղեկավար Իվան Նաջար Ալավին ասել է, որ դատարանը ավելի խիստ պատիժ է սահմանել ամուսնացած կնոջ նկատմամբ այն բանից հետո, երբ նա քննիչներին խոստովանել է, որ ամուսնությունից դուրս սեռական հարաբերություն է ունեցել:

Դատավորների համար դժվար է եղել դատապարտել տղամարդուն, ով այդնույնպես ամուսնացած է եղել եւ հերքել է բոլոր մեղադրանքները, հավելել է Ալավին:

«Դատաքննության ընթացքում նա ոչինչ չընդունեց՝ հերքելով բոլոր մեղադրանքները։ Այսպիսով, դատավորները չկարողացան ապացուցել, թե արդյոք նա մեղավոր է»,-ասել է Ալավին լրագրողներին շարիաթի օրենքը խախտողներին հրապարակային մտրակումից հետո:

Աչեհը Ինդոնեզիայի միակ մուսուլմաններով բնակեցված շրջանն է, որտեղ գործում են շարիաթի օրենքները, որոնք թույլ են տալիս մտրակել, ներառյալ՝ մոլախաղերի, ամուսնական դավաճանության, ալկոհոլի օգտագործման եւ միասեռական կապերի մեղադրանքներով:

Ըստ AFP-ի թղթակցի՝ կնոջ մտրակումը կարճ ժամանակով դադարեցվել է, քանի որ նա չի կարողացել տանել ցավը:

Անչափահասի հետ սեռական հարաբերություն ունենալու համար դատապարտված մեկ այլ տղամարդ մտրակի 100 հարված է ստացել։ Տղամարդը նաեւ 75 ամիս ազատազրկում է կրում մտրակահարության հանցանքի համար, հայտնել են դատախազները: