Շաբաթը մեկ վթար է, այդ գարշահոտ ջրով ո՛չ լինում է լողանալ, ո՛չ լվացք անել, էլ չասենք խմելու մասին. Զովունիի բնակիչներ

Զովունիի մի շարք բնակիչներ նամակով դիմել են խմբագրություն՝ խնդրելով աջակցել իրենց ջրի խնդրի լուծմանը:

Բնակիչների նամակում ասվում է.

«Ձեզ գրում են Զովունու մի շարք բնակիչներ, ում տներում արդեն տեւական ժամանակ է խմելու ջրի որակը սարսափելի է, խնդրում եմ լուսաբանեք այս հարցը, գուցե բարձրաձայնելով հնարավոր լինի ժամանակավոր լուծումներ գտնել, մինչեւ խողովակների ամբողջ համակարգը փոփոխելը, «Վեոլիա ջրին» ահազանգում ենք հերթական վթարի մասին, գալիս են ջրի նմուշներ տանում քիմիական եւ մանրէաբանական անալիզի, սակայն արդյունքների մասին մեզ տեղյակ չեն պահում, նախորդ անգամ պահանջել էինք գրավոր, կնիքով տրամադրել արդյունքները , որպեսզի մեր անկախ լաբորատորիայում արված արդյունքների հետ համեմատել, սակայն ոչ մի պատասխան չեղավ նրանց կողմից։

Եվ այսպես շաբաթը մեկ նույն վթարները, նույն խայտառակ դրությունը, այդ գարշահոտ ջրով ո՛չ լինում է լողանալ, ո՛չ լվացք անել, էլ չասեմ խմելու մասին, մեր թաղամասը վերածվել է սանիտարահիգիենիկ մի վայրի, ուր վտանգված է այստեղ ապրող մանուկների եւ մեծահասակների առողջությունը, կյանքը։

Եվ ահա, կցում ենք տեսանյութը, որտեղ ինքներդ կտեսնեք ինչի մասին է խոսքը, տեսանկարել եմ երեկ մեր խմելու ջուրն է, խնդրում ենք օգնել այս հարցը հասցնել պատկան մարմիններին»: