Ֆրանսիայի ոստիկանությունը ձերբակալել է բրիտանական ընտանիքի առեղծվածային սպանության մեջ կասկածվողին

Ֆրանսիական ոստիկանությունը ձերբակալել է 2012 թվականին Վերին Սավոյա լեռնային դեպարտամենտում բրիտանական ընտանիքի սպանության մեջ կասկածվողին։ Այս հանցագործությունը համարվում է Ֆրանսիայում ամենաաղմկահարույց եւ առեղծվածային չբացահայտված գործերից մեկը, հայտնում է BBC-ն։

Կասկածյալի անունը եւ սեռը չի հաղորդվում: Հայտնի է, որ ձերբակալությունը ոստիկանությունն իրականացրել է Շամբերի ալպյան քաղաքում։

Ոստիկանությունը հայտարարել է, որ մի անձի ձերբակալությունը, ով կարող է ներգրավված լինել մոտ մեկ տասնամյակ առաջ կատարված հանցագործության մեջ, հազվագյուտ հաջողություն է։

Առայժմ այս գործի հետաքննության մեջ էական առաջընթաց չի գրանցվել, չնայած նրան, որ դրանով զբաղվում են ֆրանսիացի եւ բրիտանացի ավելի քան հարյուր սպաներ։

Իրաքյան ծագումով Մեծ Բրիտանիայի քաղաքացի, 50-ամյա Սաադ ալ Հիլլիի ընտանիքը հանգստանում էր Ֆրանսիայում։ Ալ Հիլլիի, նրա կնոջ եւ զոքանչի մարմինները հայտնաբերվել են 2012 թվականի սեպտեմբերի 5-ին՝ բրիտանական համարներով BMW մակնիշի ավտոմեքենայում, Անսի լճի մոտ գտնվող անտառային կայանատեղիում։

Նրանք բոլորը սպանվել են բազմաթիվ կրակոցներից, այդ թվում՝ գլխին։ Սպանության վայրում ոստիկանները հայտնաբերել են տասնյակ օգտագործված պարկուճներ, ինչպես նաեւ շվեդական եւ իրաքյան անձնագրեր։

Ենթադրվում է, որ բոլոր կրակոցներն արձակվել են մեկ զենքից՝ 1906 թվականի արտադրության «Լյուգեր» կիսաավտոմատ ատրճանակից։

Մեքենայի մոտ հայտնաբերվել է նաեւ տեղի բնակչուհու՝ 45-ամյա Սիլվանա Մոլյեի դին, ով, ըստ երեւույթին, հեծանվով անցելիս է եղել հանցագործության վայրի կողքով եւ, հավանաբար, պատահական զոհ է դարձել։

Մեքենայում եղել են նաեւ սպանված զույգի երկու դուստրերը՝ յոթ եւ չորս տարեկան։ Ավագը՝ Զեյնաբը, վիրավորվել է երեք գնդակից, ընկել կոմայի մեջ, սակայն ողջ է մնացել ֆրանսիացի բժիշկների վիրահատական միջամտության շնորհիվ։

Կրտսերը՝ Զինան, հարձակման ժամանակ չի տուժել։ Մայրը մարմնով ծածկել է աղջկան, եւ նրան քննչական խմբի աշխատանքի մեկնարկից ութ ժամ անց են հայտնաբերել։

Այդ ժամանակվանից աղջիկներն ապրում են ուրիշ անուններով։ 2020-ին քննիչները նրանց նորից են հարցաքննել, բայց գործի բացահայտումը տեղից չի շարժվել։

Սպանության հնարավոր դրդապատճառների թվում Ֆրանսիայի իրավապահ մարմինները դիտարկել են կողոպուտի փորձը, թմրանյութերի ընդհատված գործարքը եւ ընտանեկան վեճը։ Վարկածներից մեկը ընտանիքի ղեկավարի մասնագիտական գործունեությունն է, նա որպես ինժեներ էր աշխատում արբանյակային ոլորտում, այդ թվում՝ զբաղվում էր գաղտնի մշակումներ անելով։

Հիմնական իրերից մեկը, որից կարելի էր կառչել, աջ ղեկով ամենագնացն էր, ենթադրաբար բրիտանական պետհամարանիշներով, որը տեսել էին Անսիի մոտ գտնվող ճանապարհին սպանությունից մոտ 20 րոպե առաջ:

Սակայն դրա որոնումն անհաջող է ավարտվել։

2013 թվականի հունիսին Բրիտանիայում կալանավորվել է ընտանիքի սպանված հոր եղբայրը՝ Զայեդ ալ Հիլլին։ Ֆրանսիայի ոստիկանությունը հայտնել է, որ հիմքեր ունի նրան հարցաքննելու որպես կասկածյալ։

Ավելի վաղ ԶԼՄ-ներում տեղեկություններ էին տարածվել, որ սպանության պատճառ կարող էր լինել փողի հետ կապված կոնֆլիկտը, որ հնարավոր է եղել է սպանված Սաադ Հիլլիի եւ նրա եղբոր՝ Զայեդի միջեւ։

Սակայն Զայեդ ալ Հիլլիի դեմ այդպես էլ մեղադրանք չի առաջադրվել:

2017-ին ֆրանսիական ոստիկանությունը հայտարարել է, որ սպանությունից հինգ տարի անց քննիչները դեռեւս հստակ կապեր չեն տեսնում։