Ղազախստանի Ազգային գվարդիան տեղեկացրել է երկու զինծառայողի զոհվելու մասին

Ղազախստանի Ազգային գվարդիայի երկու զինծառայող հունվարի 5-ին զոհվել է զանգվածային անկարգությունների ժամանակ։ Այս մասին հունվարի 7-ին տեղեկացրել է «Իզվեստիա»-ն՝ հղում կատարելով Ազգային գվարդիայի մամուլի ծառայությանը։

«Երկու պայմանագրային զինծառայող հրազենային վիրավորումներ է ստացել եւ վիրաբուժական բաժանմունքում է։ Հինգ ժամկետային զինծառայող վերակենդանացման բաժանմունքում է՝ ծանր վիճակով։ Տարբեր աստիճանի բազմաթիվ վնասվածքներ են ստացել բազմաթիվ սպաներ։ Ցավով նշում ենք, որ 2022թ. հունվարի 5-ին հանրային կարգի վերականգնման ծառայողական-մարտական առաջադրանքները կատարելիս զոհվել է ժամկետային երկու զինծառայող՝ շարքայիններ Մադիյար Կայսարովը եւ Այբաթ Ամանովը»,- ասվում է հաղորդագրությունում։

Մամուլի ծառայությունը նաեւ տեղեկացրել է, որ Ալմաթիում եւ Շիմքենտում իրավակարգի վերականգնման ժամանակ վնասվածքներ է ստացել 216 զինծառայող։

«Ներկայում նրանք բոլորը տարբեր աստիճանի վնասվածքներով, այդ թվում եւ հրազենային վերքերով, գանգուղեղային բաց վնասվածքներով, ոսկրերի կոտրվածքներով եւ այլ վնասվածքներով գտնվում են քաղաքի բուժական հաստատություններում»,- ասել են Ազգային գվարդիայում։

Մամուլի ծառայության տվյալներով՝ զանգվածային անկարգությունների ժամանակ վնասվել է մոտ 50 միավոր ռազմատեխնիկա, ութ մեքենա վերականգնման ենթակա չէ։

«Գվարդիականները պաշտպանության տակ են վերցրել կենսականորեն կարեւոր օբյեկտներ եւ մայրաքաղաքի ենթակառուցվածքը։ Մոտ 600 զինծառայող ապահովում է իրավակարգի պաշտպանությունը Շիմքենտում, այդ թվում պաշտպանելով ակիմատի (քաղաքապետարանի – խմբ.) շենքը եւ այլ օբյեկտներ»,- տեղեկացրել են Ազգային գվարդիայում։

Գվարդիայում նաեւ փաստել են, որ «խուլիգանություն անող ամբոխը հարձակման եւ ջարդարարությունների համար օգտագործում է հարթափող հրացաններ, ձեռքի տակ եղած ամեն բան, այդ թվում հրկիզող խառնուրդներ՝ «Մոլոտովի կոկտեյլներ», խողովակներ եւ ամրաններ»։

Ցույցերը Ղազախստանում սկսվել են հունվարի 2-ին։ Հանրահավաքների մասնակիցները դեմ էին հեղուկացված գազի գնի բարձրացմանը։ Շուտով ցույցերը վերածվեցին անկարգությունների։

Իրավիճակը հատկապես սրվեց երկրի ամենամեծ քաղաքում՝ Ալմաթիում։ Ցուցարարները ներխուժեցին քաղաքապետարանի շենք, հրդեհեցին դատախազության շենքը եւ կառավարող կուսակցության գրասենյակը։ Բացի այդ, ցույցերի արմատական մասնակիցները զինվեցին եւ սկսեցին թալանը՝ ավերելով խանութներ, դեղատներ եւ քաղաքի բանկերը։ Հաղորդվում էր զինվորականների եւ ցուցարարների միջեւ փոխհրաձգության մասին։

Նաեւ հայտնի դարձավ, որ ցույցերի ժամանակ զոհվել են ուժայիններ։ Ավելի ուշ տեղեկացվեց, որ նրանց թիվը հասել է 18-ի, նրանցից երկուսը գլխատվել է։

Ղազախստանի նախագահ Կասիմ-Ժոմարտ Տոկաեւը նշել է, որ կառավարական հաստատությունները զավթել են ահաբեկիչների խմբեր։ Նա ավելացրել է, որ անկարգություններ կազմակերպած ավազակները լուրջ պատրաստություն են ստացել արտասահմանում։ Ալմաթիի պարետատանը նաեւ հայտարարել են, որ հարձակվողների դաժան գործողությունները վկայում են ավազակային կազմավորումների ահաբեկչական եւ ծայրահեղական բնույթի մասին։ Նախագահի աշխատակազմում նշել են, որ Ալմաթիում գործող գրոհայինների մեջ կան դիպուկահարներ հատուկ հրացաններով։

Նշենք, որ Ղազախստանի իշխանությունները «ահաբեկիչների» հայտնվելու մասին սկսեցին խոսել միայն այն բանից հետո, երբ կորցրին երկրում իրավիճակի վերահսկողությունը։ «Նուր Օթան» («Հայրենիքի լույսը») կառավարող կուսակցությունը մինչեւ հիմա ի վիճակի չգտնվեց անգամ հանդես գալու հայտարարությամբ, չգումարվեց նաեւ Ղազախստանի խորհրդարանը։ Արեւմտյան ԶԼՄ-ները, քաղաքացիական հատվածի եւ ընդդիմության ներկայացուցիչները նախօրեին հայտարարել էին, որ զինվորականները կրակ են բացել գերազանցապես անզեն երիտասարդների ուղղությամբ։