Ցուցարարները կրկին հավաքվել են Ալմաթիի Հանրապետության հրապարակում

Ալմաթիի Հանրապետության հրապարակում կրկին ցուցարարներ են հավաքվում, հայտնում է «Sputnik Ղազախստան»-ի թղթակիցը։

«Այժմ այնտեղ մոտ 200-250 մարդ կա։ Նրանց աստիճանաբար հավաքվում են հրապարակում։ Ոստիկաններ եւ զինվորականներ դեռ չկան»,- ասվում է հրապարակման մեջ։

Նշվում է, որ մարդիկ կրկին հավաքվում են նաեւ Ակտաուի հրապարակում։

«Sputnik Ղազախստան»-ի փոխանցմամբ՝ նրանք նոր պահանջներ առաջ չեն քաշում, այլ քննարկում են կազմակերպչական հարցեր, այդ թվում՝ աղբը հեռացնելու անհրաժեշտության մասին։

Մանգիստաու շրջանի բնակիչները միմյանց հորդորում են այլեւս հանրահավաքների դուրս չգալ։ Նրանց պահանջները կատարվել են, համապատասխան հաղորդագրությունը նրանք տարածում են WhatsApp-ով։

***

Ղազախստանի նախագահը մի շարք հրատապ հանձնարարականներ է տվել կառավարությանը

Ղազախստանի նախագահ Կասիմ-Ժոմարտ Տոկաեւը մի շարք հրատապ հանձնարարականներ է տվել կառավարությանը, հայտնում է «Sputnik Ղազախստան»-ը։

Մասնավորապես, հանձնարարվել է.

- Հատուկ քննչական խումբ ստեղծել՝ բաղկացած Գլխավոր դատախազության, ՆԳՆ-ի, ԱԱԿ-ի եւ իրավասու այլ կառույցների ներկայացուցիչներից՝ անկարգությունների բոլոր մեղավորներին քրեական եւ վարչական պատասխանատվության ենթարկելու համար։

- Զինված ուժերին, Ազգային անվտանգության կոմիտեին, Ներքին գործերի նախարարությանը, Ազգային գվարդիային եւ ուժային այլ կառույցներին` բարձրացնել զինվորական անձնակազմի մարտական պատրաստությունը եւ զինծառայողների տեխնիկական հագեցվածությունը:

- Շրջանների ակիմատներին` նյութական աջակցություն ապահովել զոհված ոստիկանության եւ զինված ուժերի զոհված աշխատակիցների ընտանիքների համար։

- Ուղիղ գիծ կազմակերպել՝ քաղաքացիներին զոհերի եւ անհայտ կորածների մասին տեղեկություններ տրամադրելու համար:

- Հանձնաժողովներ ստեղծել՝ վնասի չափը գնահատելու համար, աշխատանքներ սկսել Ալմաթիում եւ այլ շրջաններում վարչական շենքերի, սոցիալական օբյեկտների, բնակելի շենքերի վերականգնման ուղղությամբ։

Ղազախստանի նախագահը նաեւ հանձնարարել է միջոցներ ձեռնարկել դիվանագիտական ​​ներկայացուցչությունների, ինչպես նաեւ օտարերկրյա ներդրումների սուբյեկտների եւ օտարերկրյա ընկերությունների բիզնեսի պաշտպանության համար։

Ղազախստանում 180 օրով բենզինի, դիզվառելիքի եւ հեղուկ գազի գների պետական ​​կարգավորում է մտցվում, հայտնել է կառավարության մամուլի ծառայությունը։

Սոցիալական կարեւորության ապրանքների գների կայունացման նպատակով Ղազախստանը վեց ամսով արգելում է խոշոր եւ մանր եղջերավոր անասունների, երեք ամսով` կարտոֆիլի ու գազարի արտահանումը։

***

Անկարգությունների արդյունքում ամբողջ Ղազախստանում տուժել է ավելի քան հազար մարդ

Ղազախստանում անկարգությունների արդյունքում տուժել է ավելի քան հազար մարդ, հայտնում է «Sputnik Ղազախստան»-ը՝ վկայակոչելով «Խաբար 24»-ը։

Հաղորդվում է, որ մոտ 400 մարդ հոսպիտալացվել է։ Եվս 62 մարդ գտնվում է վերակենդանացման բաժանմունքում։

***

Հայաստանը Ռուսաստանի, Բելառուսի, Տաջիկստանի եւ Ղրղզստանի հետ ՀԱՊԿ–ի շրջանակում խաղաղապահներ է ուղարկել Ղազախստան

ՀԱՊԿ-ի հավաքական խաղաղապահ ուժերը սահմանափակ ժամկետով ուղարկվել են Ղազախստան՝ իրավիճակի կայունացման համար, հայտնում է կազմակերպության քարտուղարությունը։

Դրանց կազմում են Ռուսաստանի Դաշնության, Բելառուսի Հանրապետության, Հայաստանի Հանրապետության, Տաջիկստանի Հանրապետության եւ Ղրղզստանի զինված ուժերի ստորաբաժանումները։

«Ղազախստան ուղարկված ՀԱՊԿ ուժերի խնդիրներն են լինելու պետական ​​եւ ռազմական օբյեկտների պաշտպանությունը, ինչպես նաեւ` աջակցությունն իրավապահ ուժերին»,- ասվում է քարտուղարության հաղորդագրության մեջ։

Նշվում է, որ ՀԱՊԿ զորակազմում Ռուսաստանից ընդգրկվել են օդադեսանտային զորքերի ստորաբաժանումները։ Ռուս խաղաղապահների առաջատար ստորաբաժանումներն արդեն անցել են իրենց խնդիրների կատարմանը Ղազախստանում։