Մակրոնը մտադիր է անհանգստություն պատճառել Ֆրանսիայի չպատվաստված բնակիչներին

Ֆրանսիայի նախագահ Էմանուել Մակրոնը նախազգուշացրել է, որ մտադիր է դժվարացնել երկրի չպատվաստված բնակիչների կյանքը, հայտնում է BBC-ն։

«Ես իսկապես ուզում եմ նրանց անհանգստություն պատճառել, եւ մենք կշարունակենք դա անել մինչեւ վերջ»,-ասել է նա ֆրանսիական Le Parisien թերթին տված հարցազրույցում:

Միեւնույն ժամանակ, քաղաքական ընդդիմախոսները հայտարարել են, որ այն կոշտ արտահայտությունները, որոնք նա օգտագործում էր հարցազրույցներում, վայել չէ նախագահին։

Խորհրդարանում չպատվաստված անձանց հասարակական կյանքին մասնակցելը արգելող օրինագծի քննարկումը հետաձգվել է։

Ակնկալվում էր, որ այն կհաստատվի այս շաբաթ քվեարկության ժամանակ, սակայն ծրագրված փոփոխությունները զայրույթ են առաջացրել պատվաստանյութի հակառակորդների շրջանում, եւ մի քանի ֆրանսիացի խորհրդարանականներ ասել են, որ իրենք հաշվեհարդարի սպառնալիքներ են ստացել այդ հարցի շուրջ:

«Ես չպատվաստվածներին բանտ չեմ ուղարկելու։ Ուստի մենք պետք է նրանց ասենք. «Հունվարի 15-ից դուք այլեւս չեք կարողանա գնալ ռեստորան։ Այլեւս չի կարելի գնալ սուրճ խմելու, այլեւս չի կարելի գնալ թատրոն»,-հավելել է Ֆրանսիայի նախագահը։