Եթե արդարությունը չհաղթի, ապա կհաջորդի իրանցի ժողովրդի վրեժխնդրությունը․Ռայիսին՝ Թրամփին դատի տալու մասին

Իրանի նախագահ Իբրահիմ Ռայիսին երկուշաբթի պահանջել է դատի տալ նրանց, ովքեր պատասխանատու են Իսլամական հեղափոխության պահապանների կորպուսի «Ալ Քուդս» հատուկ նշանակության ուժերի հրամանատար գեներալ Քասեմ Սուլեյմանիի նկատմամբ հաշվեհարդարի համար: Այս մասին նա հայտարարել է Թեհրանում Սուլեյմանիի սպանության երկրորդ տարելիցին նվիրված հանրահավաքում։

«ԱՄՆ նախկին նախագահ Դոնալդ Թրամփը և Պետդեպարտամենտի նախկին ղեկավար Մայքլ Պոմպեոն պետք է կանգնեն դատարանի առջև և պատասխան տան կատարված հանցագործության համար:

Եթե արդարությունը չհաղթի, ապա իրանցի ժողովրդի վրեժխնդրությունը կհաջորդի»,-ասել է Ռայիսին:

Նրա խոսքով ՝ «Ալ Քուդս» հատուկ նշանակության ուժերի նախկին հրամանատարն իր կյանքը նվիրել է տարածաշրջանից չար ուժերի վտարմանը:

Գեներալ Սուլեյմանին զոհվել է 2020 թվականի հունվարի 3-ին Բաղդադի օդանավակայանի մերձակայքում ԱՄՆ ՌՕՈՒ անօդաչու սարքի հարվածի հետևանքով ՝ Իրաքի շիաների «Ալ Հաշդ աշ Շաաբի» խմբավորման հրամանատարի տեղակալ Աբու Մահդի ալ Մուհանդիսի հետ: ԱՄՆ պաշտպանության նախարարությունը հայտարարել է, որ հրթիռային հարվածը հասցվել է այն ժամանակվա նախագահ Դոնալդ Թրամփի կարգադրությամբ։ Պենտագոնի վարկածով՝ գործողությունը պաշտպանական բնույթ էր կրում և նպատակ ուներ պաշտպանել Իրաքում տեղակայված ամերիկացի զինծառայողներին:

Իրանի ազգային անվտանգության բարձրագույն խորհուրդը ԱՄՆ-ի վրա է դրել հանցավոր արկածախնդրության հետևանքների ողջ պատասխանատվությունը:

Ավելի վաղ Բաղդադում և Իրանի քաղաքներում Սուլեյմանիի սպանության տարելիցի կապակցությամբ բազմահազարանոց ցույցեր են անցկացվել: ՄԱԿ-ում Իրանի մշտական ներկայացուցիչ Մաջիդ Թահթ-Ռավանչին Անվտանգության խորհրդին կոչ է արել պատասխանատվության ենթարկել ԱՄՆ-ին և Իսրայելին՝ իրանցի գեներալի նկատմամբ հաշվեհարդարի համար: Նրա խոսքով ՝ Սուլեյմանին մեծ դեր է խաղացել «Իսլամական պետություն» խմբավորման ահաբեկիչների դեմ պայքարում։