Բրիտանական համալսարանը հին հունական բանաստեղծությունից տողեր է կտրել՝ կանանց կտրուկ նկարագրությունների պատճառով

Ռեդինգի բրիտանական համալսարանը սեմինարների ժամանակ հին հունական բանաստեղծություններից տողեր է կտրել՝ մտավախություն ունենալով, որ ընտանեկան բռնության հիշատակումը կարող է «հրահրել» ուսանողներին, գրում է The Telegraph-ը։

Ռեդինգի համալսարանում դասականներին ուսումնասիրող սկսնակների հակիրճ դասընթացից հանել են Սեմոնիդես Ամորգսկու կանանց տեսակների մասին յամբերի «անհարկի տհաճ» բաժինը:

Միեւնույն ժամանակ, «Հունական պատմություն. պատերազմ, հասարակություն եւ փոփոխություններ արխայիկ դարաշրջանում» խորագրով ներածական պարապմունքների ժամանակ բանավոր նախազգուշացում է տրվել «արխայիկ Հունաստանում ծայրահեղ կնատյացության օրինակի մասին»:

Բայց այդ նախազգուշացումը հանել են, երբ դասընթացի ուսուցիչը որոշել է օգտագործված հատվածից ընդհանրապես հեռացնել «տհաճ» կարճ հիշատակումը:

Թեեւ ոչ մի ուսանող բողոք չի ներկայացրել, որոշվել է, որ աշխատանքն իր սկզբնական տեսքով կարող է խեղաթյուրված պատկերացում տալ սկսնակներին, ովքեր նոր են սկսել ուսումնասիրել դասականներին, հայտնել են համալսարանի պաշտոնյաները:

Միեւնույն ժամանակ, առաջատար գիտնականները մտահոգություն են հայտնել «պատմական ռեւիզիոնիզմի եւ հիմնական ընթերցանության գրաքննության» վերաբերյալ, որոնք կարող են սահմանափակել մտքի ազատությունը:

Կանանց տեսակների մասին յամբերի հավաքածուն վերագրվում է մ.թ.ա. յոթերորդ դարին:

118 տողանոց աշխատանքը նկարագրում է կանանց տասը տեսակ, որոնք ստեղծվել են հունական Զեւս աստծո կողմից՝ բնական աշխարհի մոդելների հիման վրա, որոնցից յոթը կենդանիներ են, իսկ երկուսը` բնական երեւույթներ: Նրանք բոլորը ներկայացված են որպես կործանարար կերպարներ, բացառությամբ վերջին տեսակի, որը սերում է մեղվից, որը լավ կին է։