Իրանը ՄԱԿ Անվտանգության խորհրդին կոչ է անում Սուլեյմանիի սպանության մեջ ԱՄՆ-ին եւ Իսրայելին մեղադրել

Հաշվի առնելով միջազգային խաղաղության եւ անվտանգության վրա այս ահաբեկչական հարձակման սարսափելի հետեւանքները՝ Անվտանգության խորհուրդը գեներալ Սուլեյմանիի սպանության պատասխանատվությունը պետք է դնի ԱՄՆ-ի եւ Իսրայելի վրա։ Այս մասին հայտարարել է ՄԱԿ-ում Իրանի դեսպան եւ մշտական ներկայացուցիչ Մաջիդ Թախտ Ռավանչին, փոխանցում է ԻՌՆԱ-ն։

ՄԱԿ Անվտանգության խորհրդի նախագահին ուղղված նամակում դեսպանը գրել է նոր տվյալների մասին՝ կապված «այս ահաբեկչական ակտում Իսրայելի ռեժիմի դերի հետ»։

«Իսրայելի ռազմական հետախուզության նախկին ղեկավարը վերջերս տված հարցազրույցում խոստովանել է ռեժիմի մասնակցությունը նահատակ Սուլեյմանիի կանխամտածված սպանությանը՝ հայտարարելով, որ իսրայելական հետախուզությունը դեր է խաղացել նրա սպանության մեջ: Նա նաեւ նշել է, որ դա իր ղեկավարման օրոք տեղի ունեցած երկու նշանակալի սպանություններից մեկն էր»,- հավելել է իրանցի դիվանագետը:

Վկայակոչելով 2020 թվականի հունվարի 3-ին, 7-ին եւ 29-ին ՄԱԿ Անվտանգության խորհրդի նախագահին ուղղված իր նամակները՝ Թախտ Ռավանչին այս հանցավոր արարքն անվանել է ԱՄՆ-ի միջազգային պարտավորությունների կոպիտ խախտում, որը նրա միջազգային պատասխանատվություն է ենթադրում։

Իրանի դեսպանի խոսքով՝ «այդ հանցավոր ակտը քրեական պատասխանատվության է ենթարկում նաեւ բոլոր նրանց, ովքեր ուղղակիորեն կամ անուղղակիորեն նպաստել են այս ահաբեկչության նախապատրաստմանը կամ իրականացմանը ցանկացած միջոցներով, որի վառ օրինակը Իսրայելի ռեժիմի աջակցող դերն ու ներգրավվածությունն է այս սպանության մեջ»: