Այսօր "The Beatles"-ի համաշխարհային օրն է

"The Beatles"-ը բրիտանական աշխարհահռչակ ռոք խումբ է Լիվերպուլ քաղաքից: Խմբի առանձին անդամներին անվանում են «բիթլ»: Լեգենդար խմբի անդամներն էին Ջոն Լենոնը, Փոլ Մաքքարթնին, Ջորջ Հարրիսոնը և Ռինգո Սթարը: Ինչպես նաև տարբեր ժամանակներում խմբի կազմում են եղել Փիթ Բեստը, Ստյուարտ Սատկլիֆը և Ջիմի Նիկոլը: "The Beatles"-ը մասնագետների կողմից ճանաչվել է, որպես 20-րդ դարի ամենահաջող խմբերից մեկը, ինչպես ստեղծագործական, այնպես էլ կոմերցիոն առումով:

Խումբը համաշխարհային ճանաչում ստացավ 1963 թվականին' "Please Please Me (Ask Me Why)" սինգլի թողարկումից հետո և սկիզբ դրեց «բիթլմանիա» երևույթին: "The Beatles"-ը դարձավ բրիտանական առաջին խումբը, որի ձայնասկավառակները մեծ ճանաչում ձեռք բերեցին ԱՄՆ-ում և գրավեցին առաջին հորիզոնականները: Բիթլզի ստեղծագործությունների մեծամասնությունը համահեղինակել են Ջոն Լենոնն և Փոլ Մաքքարթնին: "The Beatles" ալբոմը ԱՄՆ-ում 19 անգամ ճանաչվեց պլատինե: Խումբը նվաճել է 7 Գրեմի մրցանակ: Իսկ ըստ "Rolling Stone" ամսագրի, "The Beatles-ը"  «բոլոր ժամանակների 50 լավագույն կատարողի» շարքում  զբաղեցնրել է առաջին տեղը։