Սպիտակ տան խոսնակը թվարկել է Բայդենի արտաքին քաղաքական խոշորագույն նվաճումները

Սպիտակ տան մամուլի խոսնակ Ջեն Փսակին հայտարարել է, որ ԱՄՆ նախագահ Ջո Բայդենի վարչակազմի խոշորագույն արտաքին քաղաքական նվաճումը օտարերկրյա գործընկերների հետ Վաշինգտոնի կապերի ամրապնդումն է և միջազգային կազմակերպություններում Միացյալ Նահանգների առաջատար դերի վերականգնումը: «Արմենպրես»-ի հաղորդմամբ՝ այդ մասին հայտնում է ամերիկյան «Ֆոքս Նյուզ»-ը:

Սպիտակ տան խոսնակը նախագահ Բայդենի ձեռքբերումների թվում նշել է նաև վարչակազմի դերը կորոնավիրուսի դեմ պատվաստանյութերի տարածման գործում ոչ միայն Ամերիկայի, այլև համաշխարհային մակարդակով: Փսակիի խոսքով՝ Միացյալ Նահանգները դարձել է այն շարժիչ ուժը, որը առաջ է մղել համաշխարհային տնտեսության վերականգնումը համավարակից հետո:

Բացի այդ, ըստ խոսնակի՝ Բայդենի վարչակազմը վերադարձրել է Նահանգները այնպիսի առաջնահերթ հիմնախնդիրների լուծման գործընթացներին, ինչպիսին է կլիմայի փոփոխությունը: Նախագահ Բայդենի գալով՝ Միացյալ Նահանգները նորից միացել է Փարիզի համաձայնագրին:

Թվարկելով վարչակազմի նվաճումները՝ Փսակին նաև ընդգծել է Միացյալ Նահանգների դաշինքների վերականգնումը, այդ թվում` Եվրոպայի հետ:

Ավելի վաղ Ջեն Փսակին ասել էր, որ Աֆղանստանից ամերիկյան զորքերի դուրսբերումը Բայդենի կարևոր ձեռքբերումներից է, սակայն երբ վերջին ճեպազրույցի ընթացքում լրագրողները խնդրել են Սպիտակ տան խոսնակին թվարկել վարչակազմի «խոշորագույն արտաքին քաղաքական նվաճումները», նա չի հիշատակել Աֆղանստանում Նահանգների վարած 20-ամյա պատերազմի ավարտը այդ խոշորագույն ձեռքբերումների թվում: