Մագնուս Կարլսեն․ Չէի սպասում, որ այսքան կարճ կտեւի չեմպիոնական մրցամարտը

Շախմատի աշխարհի չեմպիոն, նորվեգացի Մագնուս Կարլսենը մեկնաբանել է հաղթանակը ռուսաստանցի Յան Նեպոմնյաշչիի նկատմամբ Դուբայում անցկացված չեմպիոնական մրցամարտում։ 31-ամյա գրոսմայստերը չորրորդ անգամ պաշտպանեց տիտղոսը՝ առավելության հասնելով 7,5։3,5 հաշվով։ 14 դասական պարտիայից անցկացվեց 11-ը։ Կարլսենը 4 պարտիայում հաղթեց, 7-ում գրանցվեց ոչ ոքի։

«Առաջին հինգ պարտիաներում ոչ ոքի էր, եւ ես ոչ մի առավելություն չունեի, բայց հետո ամեն ինչ շրջվեց եւ ընթացավ իմ ծրագրով։ 6-րդ պարտիան պարզապես հրաշալի ստացվեց։ Իսկական ճակատամարտ էր, որը վճռեց ամեն ինչ։

Ընդհանուր առմամբ՝ Յանը չկարողացավ ցուցադրել իր լավագույն խաղը, ինչը ցավալի է, բայց այդպես էլ է պատահում։ Երբեմն չի օգնում նույնիսկ պատրաստությունը եւ չգիտես, թե ինչ անել։

Ես չէի սպասում, որ այսքան կարճ կտեւի մրցամարտը, այսքան արագ կավարտվի պայքարը։ Թերեւս, կարող եմ համեմատել այս մրցամարտը 2014-ի՝ Վիշվանաթան Անանդի հետ մրցամարտիս հետ»,- Կարլսենի խոսքը մեջբերում է ՖԻԴԵ-ի մամուլի ծառայությունը։

Շախմատային թագի համար պայքարում Կարլսենի այս հաղթանակն ամենախոշորն է 1993 թվականից։ Այն ժամանակ ռուսաստանցի Գարի Կասպարովը անգլիացի Նայջել Շորթին հաղթել էր 12,5։7,5 հաշվով։ Պրոֆեսիոնալ շախմատային ֆեդերացիայի վարկածով այդ մրցամարտում կարող էր անցկացվել 24 պարտիա, Կասպարովը հաղթանակի հասավ 20 պարտիայի արդյունքում։ Կարլսեն - Նեպոմնյաշչի մրցամարտում նախատեսված էր 14 դասական պարտիա, անցկացվեց 11 պարտիա։