Կրեմլում «Հանուն ժողովրդավարության գագաթնաժողովն» ԱՄՆ-ի կողմից նոր բաժանարար գծեր ստեղծելու փորձ են անվանել

ՌԴ նախագահի մամուլի քարտուղար Դմիտրի Պեսկովը դեկտեմբերին կայանալիք «Հանուն ժողովրդավարության գագաթնաժողովն» ԱՄՆ-ի կողմից նոր բաժանարար գծեր ստեղծելու փորձ է անվանել եւ ընդգծել է, որ Ռուսաստանը բացասաբար է վերաբերվում այդ իրադարձությանը, փոխանցում է ՏԱՍՍ-ը։

«Մենք, անշուշտ, բացասաբար ենք վերաբերվում առաջիկա իրադարձությանը։ Սա ոչ այլ ինչ է, քան նոր բաժանարար գծեր անցկացնելու փորձ։ Մենք 1990-ականների սկզբին կռվեցինք-կռվեցինք բաժանարար գծերի կրճատման եւ վերացման համար, բայց հիմա Միացյալ Նահանգները նախընտրում են նոր բաժանարար գծեր ստեղծել եւ երկրները, իրենց պատկերացմամբ, լավի եւ վատի բաժանել»,- ասել է Պեսկովը լրագրողներին։

Նրա խոսքով` ԱՄՆ-ի այս դիրքորոշումը որոշակիորեն կտրված է իրականությունից. «Սա ամենեւին համընկնում աշխարհում տիրող ընդհանուր տրամադրությունների հետ։ Ավելի ու ավելի շատ երկրներ, այնուամենայնիվ, նախընտրում են ինքնուրույն որոշել, թե ինչպես են շարունակելու ապրել՝ առանց որեւէ մեկին նայելու, բայց, այնուամենայնիվ, ԱՄՆ-ում նման փորձեր արվում են»,- հավելել է Պեսկովը։

ՌԴ նախագահի մամուլի խոսնակը նշել է, որ Վաշինգտոնը փորձում է այլ երկրներին պարտադրել ժողովրդավարության իր հայեցակարգը եւ սեփականաշնորհել այդ եզրույթը։ «Նրանք փորձում են սեփականաշնորհել ժողովրդավարություն եզրույթը։ Այսինքն՝ [նրանց կարծիքով] ժողովրդավարությունը միայն այն է, ինչը համապատասխանում է Վաշինգտոնի ըմբռնմանը։ Ակնհայտ է, որ դա չի կարող եւ չպետք է այդպես լինի։ Իրականում նման բան չկա»,- եզրափակեց նա։

Վաշինգտոնը մտադիր է դեկտեմբերի 9-10-ը տեսակոնֆերանսի միջոցով ընդունել «Հանուն ժողովրդավարության գագաթնաժողովը», որին մասնակցելու են երկրների ղեկավարներ, իրավապաշտպաններ եւ գործարարներ։ Դրան մասնակցելու հրավեր է ստացել 110 երկիր եւ տարածք։

Ավելի վաղ ՌԴ ԱԳ նախարար Սերգեյ Լավրովը հայտարարել էր, որ ԱՄՆ-ի կազմակերպած «Հանուն ժողովրդավարության գագաթնաժողովը» նպատակ ունի «մարդկանց, երկրները բաժանել ժողովրդավարականների եւ ոչ ժողովրդավարականների»։ Նրա կարծիքով, երկրներին նման միջոցառման հրավիրելով, Միացյալ Նահանգները փորձում են ցույց տալ իրենց շարժման զանգվածային բնույթը։ ՌԴ ԱԳՆ ներկայացուցիչ Մարիա Զախարովան Հանուն ժողովրդավարության գագաթնաժողովը «խիմերա» է անվանել, որը պետք է ցույց տա, որ հավաքական Արեւմուտքը որոշակի կառուցողական, միավորող օրակարգ ունի»։