Ելիզավետա II-ը վերջին պահին չեղարկել է Հիշատակի օրվա արարողությանն իր մասնակցությունը

Մեծ Բրիտանիայի թագուհի Ելիզավետա II-ը վերջին պահին չեղարկել է Հիշատակի օրվա առթիվ ազգային արարողությանն իր մասնակցությունը մեջքի շրջանում ցավերի պատճառով: Այդ մասին ասվում է կիրակի Բուքինհեմյան պալատի հրապարակած հաղորդագրության մեջ, փոխանցում է ՏԱՍՍ-ը:

«Մեջքի շրջանում ցավերի պատճառով թագուհին մեծ ափսոսանքով առավոտյան որոշում է կայացրել, որ չի կարողանա մասնակցել Հիշատակի օրվա արարողությանն այս կիրակի Քենոթաֆի մոտ»,-նշվում է 95-ամյա միապետի գրասենյակի տարածած հաղորդագրության մեջ: «Թագուհին ցավում է, որ ստիպված է բաց թողնել արարողությունը»,-հավելել են պալատում:

Ավելի վաղ հայտարարվել էր, որ նոյեմբերի 14-ին թագուհու հետ արարողությանը կմասնակցի նաեւ Մեծ Բրիտանիայի վարչապետ Բորիս Ջոնսոնը: Հիշատակի կիրակին, երբ հարգանքի տուրք են մատուցում ռազմական հակամարտությունների հետեւանքով ընկած բրիտանացիներին, միշտ նշվում է հանգստյան օրերի վերջին օրը, որը հաջորդում է Կոպիենի զինադադարի ստորագրման (1918) տարելիցի օրվան՝ նոյեմբերի 11-ին: Այդ զինադադարը վերջ տվեց Առաջին համաշխարհային պատերազմին:

Արարողությանը մասնակցելով թագուհին պետք է հոկտեմբերի 19-ից ի վեր պաշտոնապես առաջին անգամ ներկայանար հանրությանը: Հոկտեմբերի 20-ին նա այցելել էր հիվանդանոց նախնական բուժզննում անցնելու համար, իսկ հաջորդ օրը՝ վերադարձել Վինդզորի ամրոց: