Սիրուշոն և Սակիս Ռուվասը՝ իրենց համատեղ See երգի մասին

«Եվրատեսիլի» երկու հաջողված մասնակիցներ՝ Հայաստանից և Հունաստանից որոշել են համատեղ երգ ձայնագրել: Այսօր Սիրուշոն և Սակիս Ռուվասը ներկայացրել են իրենց "See" երգի տեսահոլովակի թիզերը:

Eurovision.tv-ն գրում է, որ 2008 թվականին Սիրուշոն մասնակցել է «Եվրատեսիլ» երգի մրցույթին և իր «Քելե-Քելե» երգով զբաղեցրել Հայաստանի համար ռեկորդային՝ 4-րդ տեղը: Սակիս Ռուվասն էլ "Shake it" երգով զբաղեցրել է երրորդ տեղը, հետագայում՝ 2006-ին Հունաստանում, իսկ 2009-ին Մոսկվայում նորից մասնակցել է նույն մրցույթին:

Կայքին տված հարցազրույցում Սիրուշոն բացահայտել է, թե ինչու է հույն արտիստի հետ համագործակցությունն իր համար այդքան հարազատ. «Մեր ժողովուրդները շատ ընդհանրություններ ունեն, երկուսն էլ շատ էմոցիոնալ են: Մենք կարող ենք շատ արագ տխրել, բարկանալ, բայց գիտենք, թե ինչպես իսկապես զվարճանալ: Հայերն ու հույներն աշխարհի հնագույն ժողովուրդներից են: Մեր ժողովուրդների բարեկամությունը երկար տարիների պատմություն ունի, և այդ երգով մեր բարեկաությունը հաստատելը համարեցինք ճիշտ քայլ:

Իր զուգընկերոջ՝ Սակիս Ռուվասի մասին Սիրուշոն ավելացրել է. «Սակիսը հիանալի արտիստ է: Մենք երկուսս էլ երկար ժամանակ է, ինչ ներկայացնում ենք մեր երկրները և երաժշտության մեջ ունենք համանման ձեռքբերումներ: Սակիսը հունական շուկայում երկար ժամանակ է առաջատար արտիստ է: Հաճելի է նրա հետ համագործակցելը: Ես կարծում եմ, որ այս նախագծով երկուսս էլ ուզում ենք մեր լսարանին լավ տրամադրություն հաղորդել, նրանց երջանկացնել, որպեսզի նրանք մոռանան իրենց խնդիրների մասին և կյանքը վայելեն»:

Սիրուշոն կվերադառնա՞ Եվրատեսիլ

Ես մեծ սեր եմ տածում այն մարդկանց հանդեպ, ովքեր ուզում են ինձ վերադարձնել մրցույթին, երջանիկ եմ, որ տեսնում եմ, թե ինչպես է մասնակիցների քանակն ավելանում: Ես տեղյակ եմ, որ Եվրոպայի երկրպագուներից շատերը ցանկանում են, որ իմ «Պռեգոմեշ» երգը մասնակցի Եվրատեսիլին և ես շատ շնորհակալ եմ: Բայց ես հիմա անընդհատ տարբեր տեղերում եմ լինում, անընդհատ շրջագայում եմ: Եվրատեսիլն ինձ հնարավորություն տվեց որպես արտիստ էլ ավելի աճել, ինչը ես հիմա էլ անում եմ: Այն մեծ ընտանիք է ինձ համար և ես այնտեղ կլինեմ այն ժամանակ, երբ այն իմ կարիքը կզգա:

Երբ Eurovision.tv-ն Սակիս Ռուվասից փորձել է նրանց համագործակցության և ակնկալիքների մասին խոսել, Սակիսը բացատրել է. «Ես շատ ուրախ և հուզված եմ այս համագործակցության համար: Սիրուշոն հիասքանչ երգչուհի է, բեմում դրական էներգիա է փոխանցում և մենք հիանալի ենք համագործակցում: Մեր բնավորություններն արտացոլվել են մեր երգում, որը մեր մշակույթների խառնուրդն է: Ես իսկապես հույս ունեմ, որ դուք իսկապես կհավանեք այն ինչ մենք անում ենք»:

Արդյո՞ ք Սակիսը մտածում է Եվրատեսիլ վերադառնալու մասին

«Ես «Եվրատեսիլին» 3 անգամ մասնակցել եմ՝ որից երկու անգամը՝ որպես մասնակից: Դա ինձ համար հիանալի փորձ էր: Ես երկու անգամն էլ հաճույք եմ ստացել և հանդիպել հիասքանչ երգիչների: «Եվրատեսիլ» երգի մրցույթն իմ կարիերայում նոր էջ էր: իսկ թե կվերադառնամ, թե ոչ, ոչ ոք հստակ չգիտի»: