Ձեզ բացակա չենք դնի. Կաքավաձորում բացվեց Արցախյան 3 պատերազմներում նահատակված, լեգենդ դարձած կաքավաձորցի 7 քաջորդիների հիշատակին նվիրված հերոսների պուրակ և խաչքար.shamshyan.com

Երեկ՝ նոյեմբերի 6-ին, Արագածոտնի մարզի Կաքավաձոր գյուղի կենտրոնական փողոցում բացվեց Արցախյան 1-ին, Ապրիլյան քառօրյա և Արցախյան 44-օրյա պատերազմներում նահատակված, լեգենդ դարձած կաքավաձորցի հերոսների անունով Հերոսների պուրակ և խաչքար:

Գաղափարի հեղինակ, կաքավաձորցի Նվեր Օհանյանի և նրա տիկնոջ կողմից սպիտակ սավանն իջեցնելուց հետո հոգևոր հովիվն օծեց այն, ապա տեղի ունեցավ հերոսներին նվիրված հուշ-երեկո, որի ժամանակ կենդանի կատարմամբ գյուղի դպրոցի սաները հանդես եկան ասմունքով, իսկական սասունցու ոգով երգեր կատարեցին, ապա տեղի ունեցավ ծաղիկների խոնարհում, մոմովառություն և խնկարկում:

Ներկա էին հերոսների հարազատները, բարեկամները, ընկերները, այդ թվում՝ զինակից: Խաչքարի քանդակագործ Արծվիկ Վարդանյանը իսկական հայի կերպարի, հայի անկոտրուն պայքարի ոգի է ներդրել խաչքարի մեջ ու տեսնելով այն հասկանում ես, որ կաքավաձորցին իսկական հայի տեսակ է, կաքավաձորցին ամեն պահի պատրաստ է հող հայրենիի համար դուրս գալ կռվի ու վստահ է, որ այդ կռվում ինքը զինվորն ու կամավորականը հաղթող են դուրս գալու:

«Այդ 3 պատերազմներում կաքավաձորցին նույնպես հաղթել է, պարտվել են քաղաքական գործիչներն ու դիվանագետները», - ֆոտոլրագրող Գագիկ Շամշյանի հետ զրույցում ասում էին կաքավաձորցիները:

«Մենք մեր երախտիքի խոսքն ենք ուղղում Հերոսների պուրակի գաղափարի հեղինակ Ն. Օհանյանին, նրա ընտանիքի անդամներին, որոնց շնորհիվ այս վայրը բարեկարգվեց ու հիմա գյուղի համար դարձել է մի նոր Եռաբլուր, սրբության սրբոց:

Ամեն անգամ այստեղ գալուց հիշելու ենք լեգենդ դարձած Արցախյան պատերազմներում նահատակված 60-ամյա Անանիա Խաչատրյանին, 50-ամյա Կայծեր Շեկիկյանին, 57-ամյա Մեսրոպ Մխիթարյանին, 49-ամյա Վահե Բաղդասարյանին, ովքեր իրենց կյանքը զոհաբերեցին Արցախյան 1-ին պատերազմին, 32-ամյա Սասուն Մկրտչյանին, ով իր կյանքը զոհաբերեց Ապրիլյան քառօրյա պատերազմին, 32-ամյա Վաղարշակ Մուրադյանին և 20-ամյա Վահան Մելքոնյանին, ովքեր իրենց կյանքը զոհաբերեցին Արցախյան 44-օրյա պատերազմին:

Մենք այս հերոս առյուծ ու արծիվ տղերքին բացակա չենք դնի: Նրանք իրենց պայքարով ապացուցեցին, որ նրանց մարմնում իսկական սասունցու արյունն է հոսել»:

Ի պատիվ հերոսների՝ պուրակում նրանց անվամբ ընտանիքի անդամների կողմից տնկվեցին խորհդանշական եղևնիներ: