Նշանածի հետ քայլելիս Գեղամը վիրավորվել է «ջորու» լույսերի թարթումից, ու դրա համար իրար գլուխ են ջարդել
Արարատի և Վայոց Ձորի մարզերի ընդհանուր իրավասության դատարանի Եղեգնաձորի նստավայրում Ռոբերտ Պապոյանի նախագահությամբ սկսվում է Կարեն Շահբազյանի գործի դատավարությունը: Այս մասին գրում է «Առաջին Լրատվական»-ը:
Գործի նախաքննությամբ պարզվել է հետևյալը:
2013 թվականի հունիսի 26-ին, ժամը 21-ի սահմաններում Վայոց Ձորի մարզի Փոռ գյուղի բնակիչներ Գեղամն ու Գրիգորը «ՎԱԶ-2102» մակնիշի մեքենայով Ազատեկ գյուղի գյուղամիջյան ճանապարհով երթևեկել են վերև-ներքև: Նույն պահին, ճանապարհի նույն հատվածով իրար հետ քայլելիս են եղել Կարեն Շահբազյանի ընկեր Գևորգը՝ իր նշանածի հետ:
Գյուղամիջով քայլող զույգին մեքենայի լույսերով չկուրացնելու նպատակով Գեղամը մեքենայի հեռահար լույսերը դարձրել է մոտակա և անցել է հետիոտների կողքով:
Գեղամի բարի մտադրությունը, սակայն, Գևորգի կողմից այլ կերպ է մեկնաբանվել. նա վիրավորական է համարել մեքենայի լույսերի թարթումը: Չէ՞ որ ինքը նշանածի հետ էր:
Պատվախնդիր Գևորգը ոչ թե ինքն է խնդիրը պարզաբանել, այլ անմիջապես զանգել է ընկերոջը՝ Կարեն Շահբազյանին, ով այդ ժամանակ Ազատեկ գյուղում էր գտնվում:
Գևորգն ընկերոջը տեղեկացրել է «ջորի» մեքենայի «հանդգնության» ու իր վիրավորվածության մասին, և Կարեն Շահբազյանն իր «ՎԱԶ-2106» մեքենայով շտապել է գյուղամեջ:
Այնտեղ նա հանդիպել է Գրիգորին, Գեղամին ու նրանց ընկեր Սիրակին:
Ըստ մեղադրանքի՝ Կարեն Շահբազյանը վիճաբանության մեջ է մտել Սիրակի ու մյուսների հետ, հայհոյել, քաշքշել նրանց, բռնություն գործադրել, այնուհետև իր մեքենայի սրահից վերցրել է 50-60 սմ երկարությամբ փայտե ձող, այն գործադրել որպես զենք, տվել բռնության գործադրման սպառնալիքներ:
Սիրակ Հակոբյանը իրական և կոնկրետ բռնությունից խուսափելու համար դիմել է փախուստի:
Կարեն Շահբազյանը գյուղամիջյան ճանապարհով վազելով՝ հետապնդել է Սիրակին մինչև Լ. Խաչատրյանի տուն, որտեղ Սիրակը թաքնվել է Կարենի հետապնդումից:
Ըստ մեղադրանքի՝ Կարեն Շահբազյանի խուլիգանական գործողությունները տևել են մոտ տասը րոպե և խափանվել են Սիրակի թաքնվելու արդյունքում:
Սակայն բանը սրանով չի ավարտվել:
Կարեն Շահբազյանի կողմից իր նկատմամբ բռնություն գործադրելու, իրեն հետապնդելու մասին Սիրակ Հակոբյանը բջջային հեռախոսով տեղեկացրել է իր հորը՝ Վարդան Հակոբյանին:
Վերջինս շտապել է Կարենին հանդիպել ու պարզաբանում ստանալ:
Նա որդու հետ մեքենայով գնացել է Վայք քաղաք, որտեղ փողոցում հանդիպել է Կարեն Շահբազյանին: Բնականաբար, վիճաբանություն է սկսվել:
Ըստ մեղադրանքի՝ Կարեն Շահբազյանը դարձյալ գործի է դրել իր փայտե մահակը:
Նա այդ մահակով դիտավորությամբ հարվածել է Վարդան Հակոբյանի գլխին՝ պատճառելով ձախ քունքոսկրի խրթեշի կոտրվածք՝ անցումով գանգի հիմի ոսկրերին, գլխուղեղի թեթև աստիճանի սալջարդ, պարանոցային վեցերորդ մարմնի չբարդացված կոմպրեսիոն կոտրվածք, ճակատագագաթային շրջանի քերծվածք:
Վարդան Հակոբյանի առողջությանը հասցվել է կյանքին վտանգ սպառնացող ծանր վնաս:
22-ամյա Կարեն Շահբազյանին մեղադրանք է առաջադրվել խուլիգանության և դիտավորությամբ ծանր մարմնական վնասվածք պատճառելու համար՝ ՀՀ քրեական օրենսգրքի 258 հոդվածի 4-րդ և 112 հոդվածի 1-ին մասերով:
Շահբազյանի խափանման միջոցը կալանավորումն է: