ԱԱ. 8-րդ օրը Հայաստանն ունի 3 մասնակից

Սերբիայի մայրաքաղաք Բելգրադում ընթացող բռնցքամարտի աշխարհի առաջնությունում Հայաստանի թիմի ներկայացուցիչները շարունակում են պայքարը 1/8 եզրափակիչում:

8-րդ մրցումային օրը՝ նոյեմբերի 1-ին Հայաստանն ունի 3 մասնակից՝ 51 կգ, 57 կգ եւ 63.5 կգ քաշային կարգերում:

51 կգ քաշայինների 1/8 եզրափակիչում Եվրոպայի չեմպիոն Արթուր Հովհաննիսյանը կմրցի ԱՄՆ ներկայացուցիչ Հիլլ Ռոսկոյի հետ:

Ռիոյի Օլիմպիական խաղերի մասնակիցը պայքարը սկսել է 1/16 եզրափակիչից, որտեղ 5:0 հաշվով հաղթել էր Գերմանիան ներկայացնող Արգիշտի Տերտերյանին:

57 կգ քաշային Արթուր Բազեյանն առանց պայքարի երկու փուլ շրջանցելուց հետո, նոյեմբերի 1-ին առաջին մենամարտը կանցկացնի աշխարհի առաջնությունում: 1/8 եզրափակիչում Հայաստանի ներկայացուցիչը ուժերը կչափի կուբացի Օվսել Գարիսա Կաբալերոյի հետ:

Հիշեցնենք, որ 1/32 երզափակիչում Բազեյանի մրցակից Ջան Ռիվերա Պիզառոն չէր ներկայացել մենամարտին եւ հաղթանակը շնորհվել էր Հայաստանի ներկայացուցիչին: 1/16 եզրափակիչում եւս Բազեյանի մրցակից, չինական Տայպեյի ներկայացուցիչ Պո-Յի Չենին առողջական խնդիրների պատճառով չներկայացավ մենամարտին:

Տոկիոյի Օլիմպիական խաղերի բրոնզե մեդալակիր, աշխարհի կրկնակի բրոնզե մեդալակիր, Եվրոպայի կրկնակի չեմպիոն Հովհաննես Բաչկովը երկրորդ մենամարտը կանցկացնի աշխարհի առաջնությունում: 1/8-րդ եզրափակիչում Հայաստանի հավաքականի ավագը կհանդիպի Իտալիայի ներկայացուցիչ Ջիանլուիջի Մալանգային:

28-ամյա գյումրեցի բռնցքամարտիկը պայքարը սկսել է 1/16 եզրափակիչից, որտեղ տպավորիչ հաղթանակ է տարել ադրբեջանցի Մալիկ Հասանովի նկատմամբ:

Արթուր Բազեյանը կմենամարտի ցերեկային մրցահերթում, Արթուր Հովհաննիսյանն ու Հովհաննես Բաչկովը՝ երեկոյան մրցահերթում:

Կարեն Աղամալյանի գլխավորած թիմն աշխարհի առաջնությանը ներկայացել էր 11 բռնցքամարտիկներով, որոնցից պայքարը շարունակում են Արթուր Հովհաննիսյանը (51 կգ), Արթուր Բազեյանը (57 կգ), Հովհաննես Բաչկովը (63.5 կգ) եւ Դավիթ Չալոյանը (+92 կգ)։

Պայքարից դուրս են մնացել Սեյրան Եղիկյանը (48 կգ), Վահե Բադալյանը (54 կգ), Կարեն Տոնականյանը (60 կգ), Գուրգեն Մադոյանը (67 կգ), Արման Դարչինյանը (71 կգ), Համբարձում Հակոբյանը (80 կգ) եւ Նարեկ Մանասյանը (92 կգ):