Բայդենն ակնկալում է Եվրոպայում հանդիպել Էրդողանի հետ

ԱՄՆ նախագահ Ջո Բայդենն ակնկալում է Եվրոպա այցի շրջանակում հանդիպել Թուրքիայի նախագահ Ռեջեփ Թայիփ Էրդողանի հետ Գլազգոյում ՄԱԿ-ի Կլիմայի փոփոխության շրջանակային կոնվենցիայի կողմ երկրների 26-րդ համաժողովի շրջանակում։

Ինչպես հաղորդում է ՏԱՍՍ-ը, այս մասին հինգշաբթի օրը հայտարարել է ԱՄՆ նախագահի ազգային անվտանգության գծով օգնական Ջեյք Սալիվանը:

Նրան հարցրել են, թե արդյոք Բայդենը մտադիր է Գլազգոյում հանդիպել Էրդողանի հետ։ «Ես ակնկալում եմ, որ նա կհանդիպի Թուրքիայի նախագահի հետ Գլազգոյում: Ես հաստատում չունեմ, բայց կարծում եմ, որ [ԱՄՆ] նախագահը սպասում է դրան», - ասել է Սալիվանը:

Հիշեցնենք, որ չորեքշաբթի Էրդողանը լրագրողներին ասել էր, որ Գլազգոյում Բայդենի հետ իր առաջիկա բանակցությունների հիմնական թեման լինելու է հինգերորդ սերնդի F-35 կործանիչների հետ կապված իրավիճակը։