Երգիչ Արմոյի և Անիի ծովափնյա հարսանիքը (լուսանկարներ)
Երգիչ Արմոն վերջերս ամուսնացել է: Երգչի և սիրելիի' մասնագիտությամբ իրավաբան Անիի ծանոթությունը պատահական է կայացել:
Արմոն Անիին գտել է ֆեյսբուքով ու հավանել նրան: «Ժամանակին բավականին ակտիվ էի ֆեյսբուքում: Սկսեցի գրել նրան, սակայն երկար ժամանակ նա չէր պատասխանում իմ նամակներին: Նրա հետ խոսելն ինձ համար սկզբունքի հարց էր դարձել, քանի որ անընդհատ գրում էի, իսկ նա համառորեն չէր պատասխանում»,-նշեց երգիչը, ով սկզբնական շրջանում սոցիալական ցանցով է շփվել սիրելիի հետ: -Որոշ ժամանակ անց' ապրիլին, նրան տեսնելու ու սիրո խոստովանություն անելու համար մեկնեցի Ֆրանսիա, և մենք միասին Հայաստան եկանք: Այնուհետև Անին դարձյալ մեկնեց, որովհետև պետք է քննություններ հանձներ»: Որոշ ժամանակ անց սիրելին կրկին Հայաստան է եկել ու իրենք սկսել են միասին ապրել. «Անիի ծնողները ևս Հայաստան եկան ու ընտանիքներով նշեցինք մեր միությունը»:
Անդրադառնալով հարսանիքին' Արմոն նշեց, որ չեն ցանկացել հայկական ավանդական հարսանիք անել. «Պետք է փոքր մի բան կազմակերպեինք ու մտածեցինք, որ գուցե շատերը նեղանան: Որոշեցինք մեղրամիսն ու հարսանիքը համատեղել և 7 օրով մեկնել Դուբայ, որտեղ էլ օգոստոսի 29-ին տեղի ունեցավ մեր հարսանիքը»:
Արմոն ընդգծեց,որ սիրելին մեծ նվեր էր իր համար. «Աստված ինձ շատ մեծ նվեր արեց. նախ նվիրեց կնոջս, ապա փոխեց կյանքս' ինձ դարձնելով ճշմարիտ քրիստոնյա»:
Հարսանիքի օրը զույգին միացել են այն մարդիկ, ովքեր ցանկացել են մեկնել Դուբայ ու մասնակցել հավաքույթին: Հայտնիներից ներկա են եղել Արամ Նիկոլյանը'կնոջ հետ, Արամայիս Հայրապետյանն ու Լուսինե Աղաբեկյանը:
Արմոյի և Անիի հարսանիքը տեղի է ունեցել ծովափին, իսկ պսակադրության մասին խոսելիս երգիչը նշեց. «Այնտեղ որոշել էինք քահանա կանչել, որ օրհներ մեր միությունը: Քահանան նշեց, որ պետք է մենք գնանք օրհնություն ստանալու: Բացի այդ, պետք է բժշկական թուղթ ներկայացնեինք»:
Արմոյից տեղեկացանք նաև, որ կինը' 25-ամյա Անին, 17 տարի Ֆրանսիայում է ապրել ու առաջիկայում էլ իրենք պատրաստվում են Ֆրանսիա մեկնել ու հանգստանալ: Երգչի փոխանցմամբ' այնտեղ բնակվելու ծրագրեր դեռ չունեն:
Արմոն նշեց, որ ընտանիքի համալրման մասին մտածում են ամուսնության առաջին օրվանից: «Ամեն ինչ Աստծո կամքին ենք թողնում»,-ավելացրեց նա:
ESem.am-ը շնորհավորում է զույգին ու երջանիկ համատեղ կյանք մաղթում: