Բրիտանական միապետական կազմակերպությունը նոր բացահայտումներ է արել օֆշորային ընկերության միջոցով Ալիևների ձեռք բերած սեփականության և մեքենայությունների վերաբերյալ

Ֆինանսական փաստաթղթերի՝ պատմության մեջ խոշորագույն արտահոսքի շնորհիվ բացահայտվել են աշխարհի մի շարք ազդեցիկ և մեծահարուստ անձանց, այդ թվում և համաշխարհային առաջնորդների և քաղաքական, հասրակական այլ գործիչների օֆշորային գաղտնի գործարքները:

Ինչպես հաղորդում է The Guardian-ը, խոսքը «Պանդորայի փաստաթղթերի» մասին է, որը 11.9 մլն փաստաթուղթ է ներառում հարուստ հաճախորդներ ունեցող ընկերություններից, որոնց հանձնարարվել է օֆշորային կառույցներ հիմնել «հարկային դրախտավայրեր» Պանամայում, Դուբայում, Մոնակոյում, Շվեյցարիայում և Կայմանյան կղզիներում:

Արտահոսած տեղեկությունները բացահայտում են 35 համաշխարհային առաջնորդի գաղտնի գործարքները, որոնց թվում են ներկա և նախկին նախագահներ, վարչապետեր, նախարարներ: Բացի այդ, փաստաթղթերը տվյալներ են պարունակում ավելի քան 90 երկիր ներկայացնող ավելի քան 300 հանրային պաշտոնյայի (նախարարներ, դատավորներ, քաղաքապետեր և զինվորականներ) ֆինանսական գաղտնի գործարքների մասին:

Ավելի քան 100 միլիարդատիրոջ թվում են նաև հայտնիներ, ինչպես օրինակ երգիչներ կամ գործարար ոլորտի առաջնորդներ: Նրանցից շատերը նավթային ընկերությունների միջոցով թանկարժեք իրեր և սեփականություն են ձեռք բերում՝ խուսափելով հարկերի վճարումից կամ ցածր հարկ վճարելով:

Փաստաթղթերը հայտնվել են Հետաքննող լրագրողների միջազգային կոմսոցիումի (International Consortium of Investigative Journalists) տիրապետության տակ, այնուհոտև նաև մի շարք հեղինակավոր լրատվամիջոցների, որոնք առաջիկա օրերին մանրամասներ են ներկայացնելու բացահայտումների վերաբերյալ:

Ինչպես ավելի վաղ պարբերականը հայտնել էր, ֆինանսական սկանդալի կենտրոնում է հայտնվել Ալիևների ընտանիքը, որի անդամները մոտ 400 մլն ֆունտ ստերլինգի սեփականություն են ձեռք բերել Միացյալ Թագավորությունում:

Սկանդալի կենտրոնում հայտնված համաշխարհային առաջնորդներից է նաև Հորդանանի թագավոր Աբդուլլահ Երկրորդը, որը, ըստ արտահոսած տվյալների, 100 մլն դոլար արժողությամբ սեփականությունների գաղտնի կայսրություն է ստեղծել Մալիբուում, Վաշինգտոնում և Լոնդոնում:

«Պանդորայի փաստաթղթերը» բացահայտումներ են անում նաև երկու եվրոպացի ղեկավարի մասին: Նրանցից մեկը Չեխիայի վարչապետ Անդրեյ Բաբիշն է, որն օֆշորային ներդրումային ընկերության միջոցով 22 մլն դոլար արժողությամբ դղյակ է ձեռք բերել Ֆրանսիայում:

Մյուս եվրոպացի առաջնորդը Կիպրոսի նախագահ Նիկոս Անաստասիադիսն է, որի հիմնած իրավաբանական ընկերությունը մեղադրվում է ռուս սկանդալային միլիարդատիրոջ ակտիվները կեղծ ընկերությունների սեփականատերերի միջոցով քողարկելու մեջ:

Արտահոսած փաստաթղթերը տվյալներ են հայտնում նաև Մեծ Բրիտանիայի նախկին վարչապետ Թոնի Բլեերի և նրա կնոջ մասին, որոնք 312 000 ֆունտ ստերլինգ են խնայել՝ խուսափելով Լոնդոնում ձեռք բերած սեփականության հարկերից:

Ֆինանսական խարդախությունների բացահայտումից զերծ չի մնացել նաև Ուկրաինայի նախագահ Վլադիմիր Զելենսկին, որն օֆշորային ընկերությունում իր բաժնեմասի 25 տոկոսը փոխանցել է մտերիմ ընկերջը, որն էլ ներկա պահին աշխատում է որպես նախագահի խորհրդական:

Ինչպես աղբյուրը նշում է, ՌԴ նախագահ Վլադիմիր Պուտինի անունը չի հայտնվել բացահայտումների մեջ, սակայն թղթերում կան նրա մտերիմներից շատերը, այդ թվում՝ մանկության ընկեր, հանգուցյալ Պյոտր Կոլբինը, որին քննադատներն անվանում էին «Պուտինի քսակը»:

Օֆշորային կարողության մասին բացահայտումները չեն շրջանցել նաև Լատինական Ամերիկան, Ասիան և Աֆրիկան ներկայացնող ղեկավարներին: Նրանց թվում Պակիստանի ականավոր նախարարներից մեկը ներկայիս կառավարությունում՝ Մունիս Էլահին, որը դիմել է Սինգապուրում գործող օֆշորային օպերատորի՝ 33,7 մլն դոլարի ներդրում անելու համար

Քենիայի նախագահ Ուհուրու Կենյատան, որն իր երկրում մշտապես հանդես է գալիս կոռուպցիայի դեմ ելույթներով, պարտավորվում է բացատրել, թե ինչպես են ինքն ու իր մտերիմ բարեկամներն ավելի քան 30 մլն դոլարի արժողությամբ կարողություն ստեղծել, այդ թվում՝ սեփականություն ձեռք բերել Լոնդոնում: