Հայկոյի աճյունը ամփոփվել է Երևանի քաղաքային պանթեոնում

Ինչպես արդեն նշել էինք, Երևանում այսօր վերջին հրաժեշտն էին տալիս ՀՀ վաստակավոր արտիստ, սիրված երգիչ Հայկոյին (Հայկ Հակոբյան): Հարազատները, ընկերները, գործընկերներն ու հազարավոր երկրպագուները Արամ Խաչատրյան համերգասրահում էին, որտեղ արտիստի երգերի հնչյունների ներքո ու ծափահարություններով ճանապարհեցին նրան Վերև՝ ինչպես վերնագրված է երգչի սիրված երգերից մեկը:

Արտիստը կյանքից հեռացել է սեպտեմբերի 29-ին՝ 48 տարեկանում՝ կորոնավիրուսային հիվանդության հետևանքով:

Հայկոյի հոգեհանգիստը կայացել էր երեկ՝ Կոնդի Սուրբ Հովհաննես եկեղեցում: ՀՀ վաստակավոր արտիստի աճյունը ամփոփվել է Երևանի քաղաքային պանթեոնում:

հայկոյի մասին անցյալով խոսելը ցավալի է ու դժվար ոչ միայն ընկերների, այլեւ՝ երկրպագուների, ծանոթների ու, նույնիսկ, անծանոթների համար. նա եզակի արտիստ էր, որը սիրված էր, բացառապես, բոլորի կողմից՝ ասում են ընկերները.

«Հայկոն ժամանակակից հայ մշակույթի աշուղն էր, որը միջազգային բեմ բարձրացրեց հայոց սիրային արվեստը, եւ երբ նա բեմ էր բարձրանում, այնտեղ կար հայոց ներկայությունը՝ արժանապատիվ, շիտակ, շատ ազատ: Ինքը հայրենասեր էր, ինքը հայ էր, միջազգային էր, ու նա առանձին նշաձող ստեղծեց՝ թե´ Հայաստանում, թե´ միջազգային ասպարեզում: Իր համար կարեւոր էր հայ մարդը, արվեստը, մշակույթը... Եթե հետեւենք նրա կենսագրությանը, ստեղծագործական կյանքին, կհասկանանք, որ ի դեմս Հայկոյի՝ մենք մի մեծ ասպետի կորցրինք: Նա բազմագույն էր: Եթե ամեն մեկն իր կյանքը մի փոքր Հայկոյի նման ապրի, մենք կունենանք մի փոքր ավելի լավ հայրենիք՝ բոլոր ասպարեզներում: Այն, ինչ նա էր բեմի վրա՝ իր շարժումը, ձայնը, երանգը, սերը, հավատը, հայրենիքը՝ թող դրանից բոլորը դաս քաղեն: Հայկոն ուրիշ մակարդակ էր: Նրա մեջ կար ազգայինը, բալլադը, աշուղականը՝ մի ողջ մշակույթի պատկեր, որը բերում էր ժամանակակիցը՝ չմոռանալով հայոց ակունքները: Նա մեր դեսպանն էր միջազգային ասպարեզում: Հայոց մշակույթը կորցրեց մի հրաշալի դեսպանի»,-խոսելով արտիստի մասին՝ նշեց Րաֆֆի Հովհաննիսյանը:

Աշարհահռչակ հայ բռնցքամարտիկ Արթուր Աբրահամի խոսքով՝ Հայկոն հավտարիմ, ազնիվ, նվիրված ընկեր էր.

«Հայկոյի հետ անձնական շփում շատ եմ ունեցել, միմյանց շատ ենք հարգել... Կարծում եմ՝ յուրաքանչյուր հայ լսել է նրա երգերը, վայելել նրա ձայնը: Նա միշտ կմնա մեր հուշերում՝ որպես լավ մարդ ու լավ տղա: Մի քանի ամիս առաջ էինք վերջին անգամ հանդիպել, գրկաառնվել, ջերմ զրույց ունեցել: Ես նրա երգերը շատ եմ լսել ու մինչ օրս լսում եմ: Նրան շատ եմ սիրում ու հարգում՝ որպես լավ երգչի եւ լավ մարդու: Ցավում եմ, որ նա մեզ այսքան շուտ լքեց»,-իր խոսքում նշեց նա:

Հայկոն շատ ինքնատիպ էր ու սկզբունքային։ Այս մասին էլ լրագրողների հետ զրույցում ասել է երգիչ Արամոն։

«Հայկոն մնաց այն երգիչը, այն երաժիշտը, որը մինչեւ վերջ պահեց այդ սանդղակը։ Վերցրեց ռոմանսների ճանապարհն ու գնաց այդ ճանապարհով։ Նշաձողից չիջավ»,- նշեց երաժիշտը՝ հավելելով, որ շատ է արժեւորում այդ գիծը։ «Բայց բոլորը սիրում էին նրա երգերը։ Փայլուն երաժիշտ էր, լավ գործիքավորումներ էր անում»,- ասաց երաժիշտը։

Արամոն նշեց՝ ցավում է, որ քաղաքից սիրո գույն գնաց։ Նա նշեց, որ Հայկոն շատ համեստ էր, հարգալից, գիտեր ձեռք մեկնել, նաեւ ինքնամփոփ էր։ «Շատ եմ ցավում»,- ասաց Արամոն։

Երաժիշտը հիշեց, որ վերջին հաղորդագրությունը Հայկոյին ուղարկել է սեպտեմբերի 19-ին․ «Տեսել էր, բայց երեւի չկարողացավ իմ հաղորդագրությանը պատասխանել, երեւի ֆիզիկապես...։ Մինչեւ հիմա պահել եմ ու պահելու եմ»։ Արամոն նշեց, որ այս տարվա ընթացքում շատ հարազատ ընկերների է կորցրել․ «Բոլորի համարները պահել եմ հեռախոսիս մեջ, չեմ հանելու, այդ թվում Հայկոյի համարը»։

Գրիշա Աղախանյանն էլ հիշեց՝ մեկ ամիս առաջ՝ 23 տարի հետո կրկին համագործակցել էին, նշել երգչի ծնունդը. «Մինչեւ նրա՝ հիվանդանոցում հայտնվելը, մեր ընկերությունը, կարծես, նոր շունչ առավ... Հայկոյին բոլորը գիտեն. Նա այն հատուկենտ մարդկանցից է, որին բոլորն էին սիրում, որովհետեւ նա շատ համեստ ու պարկեշտ անձնավորություն էր: Այդքան գործերի հեղինակ էր, բայց այդ մասին երբեք չէր բարձրաձայնում»,-նշեց նա:

Աստված հոգիդ լուսավորի. Հայկոյին ճանապարհեցին ծափերի ներքո (Տեսանյութ. Ուղիղ)

Չունենք էլ այդպիսինը․ դերասանուհի Անահիտ Կիրակոսյանը՝ Հայկոյի մասին

Հայկոյի հետ մեր 30 տարվա ընկերությունը նոր շունչ էր ստացել. Գրիշա Աղախանյան

Արամոն հուզվեց՝ Հայկոյի մասին խոսելիս (Տեսանյութ)

Վերջին հրաժեշտը սիրված երգիչ Հայկոյին․ ուղիղ