Կոնվերս բանկը մասնակցել է Հայաստանում Արգենտինայի առևտրային պալատին նվիրված միջոցառմանը

Հայաստանում Արգենտինայի դեսպանատունը սեպտեմբերի 29–ին մեկնարկեց Հայաստանում Արգենտինայի առևտրային պալատին նվիրված միջոցառումը։

Առևտրային պալատը նպատակ ունի դառնալու գործարար նոր հարթակ, որը կառաջարկի առևտրային խթանման գործիքակազմ, կնպաստի բիզնեսի զարգացմանը և բարենպաստ միջավայր կստեղծի նոր ներդրումների և առևտրային հոսքերի համար:

Հայաստանում Արգենտինայի արտակարգ և լիազոր դեսպան Մարիանո Վերգարան նշեց, որ պալատն ի սկզբանե հիմնված կլինի վիրտուալ հավելվածի վրա, որն իրական ժամանակում կկապի արգենտինական և հայկական ընկերություններին ու ձեռնարկատերերին: Կոմերցիոն այս նոր գործիքը կդրվի հայաստանյան իշխանությունների տրամադրության տակ՝ ի նշանավորում Հայաստանի անկախ հանրապետության 30-ամյակի։

Դեսպանի խոսքով՝ պալատի գործունեությունը ուղղված է լինելու ոչ միայն տնտեսության, այլև սպորտի, տուրիզմի, մշակույթի ոլորտում երկկողմ համագործակցության խորացմանը։

Միջոցառմանը մասնակցել և Կոնվերս բանկի փորձն է ներկայացրել բանկի գլխավոր գործադիր տնօրեն Արթուր Հակոբյանը։ Նշենք, որ Կոնվերս բանկը Հայաստանում Արգենտինական կապիտալով առաջին ընկերություններից է։

Արթուր Հակոբյանը Կոնվերս բանկի անունից պատրաստակամություն է հայտնել համապարփակ աջակցություն ցուցաբերել պալատի աշխատանքներին՝ առաջարկելով ֆինանսավորման լայն գործիքակազմ և հնարավորություններ։

«Մենք բավականին ակտիվ ենք առևտրի ֆինանսավորման ոլորտում, բիզնեսի վարկավորման ոլորտում, ունենք բազմաթիվ թվային գործիքներ՝ Ինտենետ բանքինգ, Մոբայլ բանքինգ և այլն»,-ասել է Արթուր Հակոբյանը։

Նա անդրադարձել է նաև մշակույթի, կրթության և առողջապահության ոլորտում հայ-արգենտինական համատեղ ծրագրերին Կոնվերս բանկի մասնակցությանը։

«Տարիներ շարունակ Կոնվերս բանկը եղել է Հայաստանի Արգենտինական դեսպանատան ծրագրերի աջակիցը՝ մասնակցելով այնպիսի ծրագրերի իրականացմանը, ինչպիսիք են Բրյուսովի անվան համալսարանում Արգենտինական կենտրոնի բացումը, տանգոյի օրերը Հայաստանում և այլն»,-նշել է նա։

Միջոցառումը ավարտվել է երաժշտական կատարումներով։