Պատերազմը սկսվեց Դավիթի ծննդյան օրը․ Հովտաշատում հուշ-երեկո է կայացել 44-օրյա պատերազմում զոհված Դավիթ Դանիելյանի հիշատակին (Լուսանկարներ)

Սեպտեմբերի 26-ին Արարատի մարզի Հովտաշատ գյուղի մշակույթի տանը 44-օրյա պատերազմում զոհված Դավիթ Դանիելյանի հիշատակին նվիրված հուշ-երեկո է կայացել։

Հուշ-երեկոյի ընթացքում ներկաները պատմել են Դավիթի ու նրա հետաքրքրությունների մասին։ Հերոսը հետաքրքրված էր սպորտով, զբաղվում էր ֆուտբոլով և բոքսով։ Նաև հաճախում էր նկարչական խմբակ։

Սովորել է Երևանի ինֆորմատիկայի պետական քոլեջի 4-րդ կուրսում։ Ունեցել է ծառայությունը հետաձգելու հնարավորություն, սակայն ուսումը կիսատ թողնելով, 2019 թ. դեկտեմբերի 24-ին զորակոչվել է բանակ։

Առաջին 6 ամիսը ծառայել է Արմավիրի մարզում, որպես տանկի նշանառու, ապա տեղափոխվել է Մատաղիս, Թալիշ։ Երբեք չի դժգոհել, նույնիսկ պատերազմի ժամանակ, երբ կյանքի ու մահվան կռիվ էր տալիս, իր խոսքերով ոգևորում էր ընտանիքին։ Անգամ վիրավորվել էր ու այդ մասին էլ լռել։

Վերջին անգամ ընտանիքի հետ խոսել է նոյեմբերի 7-ին։ Իսկ 2 օր անց՝ նոյեմբերի 9-ին Մարտունի 2-ում Դավիթն անմահացավ։ Նա մինչև վերջ պայքարել է, մարտի դաշտից դուրս բերել զոհված ու վիրավոր ընկերներին։ Դավիթը ծնվել էր 2001 թվականի սեպտեմբերի 27-ին։