Թուրքական մամուլ. «Նույնիսկ Հայաստանի հավաքականը մեզանից առաջ անցավ»

Հոկտեմբերի 15-ին ավարտվեց Բրազիլիայում կայանալիք Ֆուտբոլի աշխարհի առաջնության նախընտրական փուլը: Վերջին տուրում Հայաստանի ֆուտբոլի ազգային ընտրանին հյուրընկալվել էր Եվրոպայի փոխչեմպիոն Իտալիային: Խաղը ավարտվել է գոլառատ ոչ-ոքիով՝ 2-2 հաշվով: Իսկ նախավերջին տուրում Հայաստանի հավաքականը Երևանում 2-1 հաշվով հաղթել էր Բուլղարիային: Այս մասին գրում է ermenihaber-ը: 

Այսպիսի արդյուքները չեն վրիպել եվրոպական և ռուսական մի շարք մարզական լրագրողների աչքերից՝ ովքեր գովեստի խոսքեր են հնչեցնում Հայաստանի հավաքականի հասցեին՝ արձանագրելով վերջին տարիներին գրանցած զգալի առաջընթացը: Իսկ հոկտեմբերի 17-ին ՖԻՖԱ-ն հրապարակեց վարկանիշային աղուսյակի թարմացված տարբերակը: Հայաստանի հավաքականը առաջադիմել է 17 հորիզոնականով և հանգրվանել է իր համար ռեկորդային 38-րդ տեղում: Այս ցուցանիշով Հայաստանի ֆուտբոլի ազգային ընտրանին շրջանցել է մի շարք հայտնի ֆուտբոլային հավաքականների՝ այդ թվում և հարևան Թուրքիային:

Թուրքիան նոր վարկանիշային աղուսյակում զբաղեցնում է 40-րդ հորիզոնականը: Թուրքիայի ֆուտբոլի հավաքականի անկումը կապված է վերջին տուրում սեփական հարկի տակ Հոլանդիայից 0-2 հաշվով կրած պարտության հետ: Թուրքական մամուլը դժգոհությամբ է արձագանքել իրենց հավաքականի գրանցած արդյունքներին՝ փոխարենը նշելով Հայաստանի հավաքականի հաջողությունները: Թուրքական «Հյուրրիյեթ» օրաթերթը Հայաստանի ազգային ընտրանու առաջընթացի մասին «Հայաստան. որտեղից ո՞ւր» վերտառությամբ հրապարակում էր ունեցել: Մեկ այլ թուրքական աղբյուր՝ «Հաբերվիթրինի» կայքը, դժգոհություն արտահայտելով Թուրքիայի հավաքականի վարկանիշային աղյուսակում զբաղեցրած հորիզոնականից, նշել է, որ նույնիսկ իրենց տեղը զիջել են Կոստա Ռիկայի, Ալժիրի, Հոնդուրասի, Պանամայի, Վենեսուելայի նման երկրներին և հայտնվել են Հայաստանին հաջորդող 40-րդ հորիզոնականում՝ անգամ սխալ նշելով Հայաստանի հանգրվանած հորիզոնականը՝ 38-ի փոխարեն նշելով 39-րդ հորիզոնական:

Հիշեցնենք որ, Հայաստանի հավաքականը չնայած հաջող ելույթներին խմբում զբաղեցրեց 5-րդ տեղը: Հայաստանի հավաքականը տարավ 4 հաղթանակ, 1 խաղ ավարտեց ոչ-ոքի արդյունքով և կրեց 5 պարտություն: Հայաստանի նման խաղի արդյունքում ընտրական B խմբում բացի առաջատար Իտալիայից ոչ մի հավաքական չնվաճեց Մունդիալ 2014-ի ուղեգիր: Նույնիսկ 2-րդ տեղ գրաված Դանիան զրկվեց անցումային խաղերին մասնակցելու իրավունքից՝ բոլոր խմբերում վատագույն 2-րդ արդյունք գրանցելու պատճառով: Իտալիան նույնպես տուժեց Հայաստանի հավաքականից: Ընտրական փուլի վերջին հանդիպման ժամանակ սեփական հարկի տակ Հայաստանի ընտրանու հետ գրանցած 2-2 ոչ-ոքի պատճառով Մունդիալ-2014 խաղարկության վիճակահանության ժամանակ ընդգրկվելու է 2-րդ զամբյուղում, ինչպես նաև վարկանիշային աղուսյակում իր դիրքերը զիջեց 4 հորիզոնականով՝ հանգրվանելով 9-րդ տեղում: Շատ մարզական վերլուծաբանների կարծիքով Հայաստանը ընդգրկված էր ամենաբարդ խմբում և իր խաղով խառնեց բոլոր թիմերի խաղաքարտերը: