Երևան է հասել Ֆրանսիայի ուղարկած «Քովիդ-19»-ի դեմ պատվաստանյութի առաջին խմբաքանակը

Ֆրանսիայի կողմից ուղարկված AstraZeneca պատվաստանյութի 25 հազար դեղաչափ պարունակող առաջին խմբաքանակը սեպտեմբերի 14-ի առավոտյան հասել է Երևանի «Զվարթնոց» միջազգային օդանավակայան:

Այս մասին «Արմենպրես»-ին տեղեկացնում են Հայաստանում Ֆրանսիայի դեսպանատնից, նշելով, որ օդանավակայանում այն ընդունել են Հայաստանում Ֆրանսիայի դեսպանության գործերի ժամանակավոր հավատարմատար պարոն Քրիստոֆ Քացախյանն ու Հայաստանի առողջապահության և Արտաքին գործերի նախարարությունների ներկայացուցիչները:

«ՀՀ իշխանությունների հետ համակարգմամբ պատվաստանյութի մնացած առաքումները կշարունակվեն վաղը և առաջիկա շաբաթների ընթացքում»,- նշված է դեսպանատան տարածած հաղորդագրության մեջ:

Հակակորոնավիրուսային պատվաստանյութն ուղարկելու մասին թվիթերյան հաղորդագրությամբ հայտնել է նաև Ֆրանսիայի նախագահ Էմանուել Մակրոնը, որի էջում հայերեն գրառում է հրապարակվել. «Ինչպես և խոստացել էի նախորդ տարվա օգոստոս ամսին, 25 000 դեղաչափ պատվաստանյութի առաջին խմբաքանակն այս երեկո կհասնի մեր հայ բարեկամներին։ Համերաշխությունը գործողության մեջ COVID-19 համավարակի դեմ պայքարում»։