Ազգային ժողովում տեսնում ենք այն իրավիճակը, որը ջունգլիներին է բնորոշ, այս ԱԺ-ն հենց տեսարաններ սարքելու վրա է հիմնված․ Զարուհի Հովհաննիսյան
Այսօր այն Ազգային ժողովը չէ, որի մասին ես կարող եմ խոսել կլասիկ կանոնների շրջանակներում, որովհետև վերկուսակցական, գաղափարական խնդիրները կամ դրանց շուրջ պայմանավորվածություններն իսպառ խզված են։ Այդ պայմանավորվածությունները պետք է լինեին մարդու իրավունքների շրջանակներում, պետք է լինեին էթիկական կանոնների շրջանակներում և այդ կանոնները հստակորեն պետք է գործեին՝ անկախ կուսակցական պատկանելիությունից կամ կուսակցական հայացքներից։ Այս մասին ArmDaily.am-ի հետ զրույցում ասել է իրավապաշտպան Զարուհի Հովհաննիսյանն անդրադառնալով Ազգային ժողովում «Պատիվ ունեմ» խմբակցության պատգամավոր Աննա Մկրտչյանի նկատմամբ կիրառված բռնությանը, որը քաղաքական մեծամասնության կին պատգամավորներից որևէ մեկը չդատապարտեց։ Նա ընդգծել է, որ այդ կանոնները պետք է լինեին նաև կանանց սոլիդարության կանոնների շրջանակում։
«Կանայք այսօրվա ԱԺ-ում կարող էին շատ էֆեկտիվ գործել, որովհետև առաջին անգամ ԱԺ-ի պատգամավորների շրջանում կանանց թիվը 30 տոկոսից ավելին է և դա բավական լուրջ ուժ կարող էր լինել, կանայք կարող են շատ ավելին անել, քան այսօր անում են իրենց նեղ կուսակցական կամ քաղաքական շահերը առաջ տանելու շրջանակում։ Ընդ որում՝ դա բոլորին է վերաբերում՝ անկախ նրանից՝ ընդդիմադիր պատգամավորներն են, թե իշխանություն կրող պատգամավորներն են։ Կարևոր է, որ նրանք կարողանային շարժվել առաջ։ Այսօրվա Ազգային ժողովը հենց նրանով է խիստ տարբերվում նախորդներից, որ որևէ հարցում չկա այն կետը, որի շուրջ նրանք կարող են գալ միասնական որոշման կամ պատկերացումներին։ Այդ պատճառով մենք Ազգային ժողովում տեսնում ենք այն իրավիճակը, որը իսկապես ջունգլիներին է բնորոշ, առանց որևէ մոտեցման, առանց որևէ սահմանագծի և մարդու իրավունքների գիտակցման։ Ցավում եմ դրա համար և այդ պատճառով էլ այսօրվա ԱԺ-ի վերաբերյալ կարծիքներ չեմ հայտնում, որովհետև կարող ես վերլուծել մի բան, որի կանոնները քո պատկերացումների շրջանակներում տեղավորվում են։ Եթե տեսնում ես, որ այդ կանոնները դուրս են եկել իրենց շրջանակից՝ արդեն դրա մասին վերլուծել ու դրա մասին խոսելը դառնում է անհնարին»։
Առավել մանրամասն՝ սկզբնաղբյուրում: