Արսեն Զախարյան. Կփորձեմ ապացուցել, որ ինձ հենց այնպես չեն վստահում

Մոսկվայի «Դինոմայի» 18-ամյա կիսապաշտպան Արսեն Զախարյանը մեկնաբանել է ֆուտբոլի Ռուսաստանի ազգային հավաքականից ստացած հրավերն ԱԱ-2022-ի՝ սեպտեմբերին կայանալիք ընտրական խաղերից առաջ:

«Իհարկե, երջանիկ էի իմանալ, որ Ռուսաստանի հավաքականի մարզչական շտաբը հրավիրել է ինձ: Ընդ որում՝ նախորդ անգամ չհասցրեցի ամբողջությամբ զգալ ազգային թիմի մթնոլորտը: Կձգտեմ ու կաշխատեմ ապացուցել, որ ինձ հենց այնպես չեն վստահում:

Հրավերի մասին իմացա, երբ ինձ հաղորդագրություն ուղարկեցին ակումբից: Իհարկե, ունեի հույս դարձյալ հայտնվել գլխավոր հավաքականում, սակայն ձգտում էի չմտածել այդ մասին, այլ կենտրոնանալ իմ խաղի ու թիմի արդյունքների վրա: Ոչինչ չէի ենթադրում: Փորձում էի առավելագույնը ցուցադրել «Դինամոյի» խաղերին: Առջևում կան առաջնության ևս 2 խաղեր, որոնց վրա կենտրոնացած եմ: Հավաքականի մասին կմտածեմ դրանից հետո: Այս պահին մտքերս Եկատերինբուրգում կայանալիք խաղի մասին են»,- Զախարյանի խոսքը մեջբերում է «Դինոմայի» մամուլի ծառայությունը:

Ռուսաստանի հավաքականն առաջիկայում թիմի նորանշանակ գլխավոր մարզիչ Վալերի Կարպինի գլխավորությամբ կսկսի պատրաստվել Խորվաթիայի (սեպտեմբերի 1), Կիպրոսի (սեպտեմբերի 4) և Մալթայի (սեպտեմբերի 7) դեմ աշխարհի առաջնության ընտրական հանդիպումներին:

Հիշեցնենք, որ ավելի վաղ Արսեն Զախարյանն ընդգրկվել էր Ռուսաստանի հավաքականի ընդլայնված կազմում և մասնակցեց հավաքի, սակայն դուրս մնաց Եվրո-2020-ի հայտացուցակից: Ընթացիկ մրցաշրջանում նա մասնակցել է 4 հանդիպման, դարձել մեկական գոլի ու գոլային փոխանցման հեղինակ։

Ռուսաստանի նախորդ առաջնությունում հայ ֆուտբոլիստը «Դինամոյի» կազմում անցկացրել էր 13 հանդիպում, դարձել 3 գոլի ու 5 գոլային փոխանցման հեղինակ: Քվեարկության արդյունքում նա ճանաչվել էր «Դինամոյի» լավագույն ֆուտբոլիստ 2020/21թթ. մրցաշրջանում: