Մի շարք հաստատությունների չպատվաստված աշխատակիցները ամսական երկու անգամ ՊՇՌ թեստ են հանձնելու. Անահիտ Ավանեսյան

Կրթական հաստատությունների դասախոսական կազմը, հանրային սննդի օբյեկտների եւ մի շարք կազմակերպությունների, ինչպես նաեւ տեղական ինքնակառավարման մարմինների աշխատակիցները պետք է ամսեկան երկու անգամ կորոնավիրուսի ՊՇՌ թեստ հանձնեն, եթե, չունենալով հակացուցումներ, հրաժարվում են պատվաստվելուց: Այս մասին լրագրողների հետ զրույցում ասաց առողջապահության նախարար Անահիտ Ավանեսյանը:

Նրա խոսքով, գոյություն ունեն հստակ հակացուցումներ, որոնց դեպքում պատվաստվել չի հարելի: Սակայն այդ ցուցակից դուրս բոլոր հիվանդությունները ոչ միայն չեն խանգարում պատվաստվելուն, այլ, ընդհակառակը, ցուցում են հանդիսանում պատվաստման համար: Օրինակ, շաքարային դիաբետը եւ այլ քրոնիկ հիվանդությունները ռիսկի լուրջ գործոն են, նման ուղեկցող հիվանդություններով պացիենտների մոտ կորոնավիրուսային վարակից մահացության տոկոսը ավելի բարձր է, դրա համար նրանց խորհուրդ է տրվում օր առաջ պատվաստվել:

Պատասխանելով լրագրողների հարցին այն մասին, թե արդյոք նման մոտեցումը չի ստիպում մարդկանց պատվաստվել, քանի որ հակառակ դեպքում, ՊՇՌ թեստերը լուրջ հարված կհասցնեն մարդկանց գրպանին, Ավանեսյանը նշեց, որ կորոնավիրուսը դեռ լուրջ մարտահրավեր է մնում երկրի համար:

«Այն անտեսանելի պատերազմ է, որը մենք մեկ ու կես տարի է վարում ենք: Մենք ունենք դեռ օրեկան գրանցվող մահեր, ունենք մտավախություն հետագայում ալիքի բարձրացման, եւ մենք որպես պետություն պետք է անենք ամեն ինչ՝ պաշտպանելու մեր քաղաքացիներին: Եւ այդ գործիքակազմի մեջ, ինչպես նաեւ շատ այլ երկրներ, օգտվելու ենք նման սահմանափակումներից, որովհետեւ այս պարագայում կոնկրետ անձի առողջությունից բացի մենք խնդիր ունենք հանրային առողջապահական լուրջ մարտահրավերի հետ, ուստի անելու ենք ամեն ինչ, օրենքի շրջանակներում, որպեսզի քաղաքացիները պատվաստվեն, ինչը ամենագործուն միջոցն է պայքարելու քովիդ-19-ի դեմ», - ասաց նախարարը:

Նա ավելացրեց, որ ճամփորդել ցանկացողները եւս պետք է թեստ հանձնեն, եւ բոլորի համար սա արդեն սովորական պրակտիկա է դարձել: